Siglir tar il cuntegn

Header

skiunz en acziun
Legenda: Laurin Cadosch en acziun Da cursa a cursa vegnir in zic meglier MAD
cuntegn

Laurin Cadosch Da la scola da talents a l'emprendissadi da sport

Laurin Cadosch, ch'ha curunà ses ultim onn en la scola da talents a Glion cun il titel campiun grischun da skis U16, stat avant si'emprima stagiun da junior. Questa stad ha el cumenzà in emprendissadi da sport. Ina cumbinaziun che pretenda disciplina da l'atlet e flexibladad dal patrun.

Il mintgadi da la famiglia Cadosch da Schluein sa drizza dapi intgins onns fitg enturn Laurin e sia passiun da far cursas da skis ed empruvar quant lunsch che quella lunga e dira via po manar. Ses ultim onn en la scola da talents a Glion ha el curunà sco meglier skiunz grischun en la categoria U16.

Skiunz cun medaglia e buccals
Legenda: Meglier skiunz grischun U16 (stagiun 2020/21) Laurin Cadosch curunescha sia stagiun cun medaglias e buccals MAD

Ses num è uss engravà en buccals che gia Ambrosi Hoffmann, Carlo Janka, Sandro Viletta, Sandro Simonet ni era ils frars Mauro e Gino Caviezel han gudagnà cura ch'els eran uschè vegls sco Laurin Cadosch. In bel success che dat motivaziun da cuntinuar. Quai fa el dapi questa stad en cumbinaziun cun in emprendissadi d'informaticher a Glion. In emprendissadi da sport che dat la schanza a talents da cumbinar professiun e sport da prestaziun.

audio
Da la scola da talents a l'emprendissadi da sport
aus Actualitad vom 07.12.2021.
abspielen. Laufzeit 4 minutas 3 Sekunden.

Emprima giada in emprendist sportist

L'interpresa d'informatica Surs-it a Glion ch'exista dapi 14 onns dat l'emprima giada la schanza ad in talent dad ir quella via dubla. Far in emprendissadi ed il medem mument filar vid la carriera da skis. Tenor il possessur e patrun Sievi Sgier èsi in dar ed in prender dad omaduas varts. Che Laurin è surtut l'enviern bler davent, da quai è l'interpresa che dat lavur ad 8 emploiads conscienta. Ins è uss al cumenzament da quella via che cuzza 4 onns e vid far las emprimas experientschas.

Medem sco la via dubla è era il squitsch dubel sin Laurin Cadosch. Sco junior en il cader dal BSV èsi sia emprima stagiun ch'el parta a cursas da la FIS ed el vul far in pass enavant e sa cumprovar. Dasperas sto era la prestaziun al plaz da lavur constar e las notas a la scola professiunala.

audio
Sievi Sgier e sia Surs-it han l'emprima giada engaschà in emprendist sportist
aus Actualitad vom 07.12.2021.
abspielen. Laufzeit 3 minutas 31 Sekunden.

En 4 onns il diplom ed esser en in cader da Swiss Ski

Era sche Laurin Cadosch na fa betg gugent plans, ha el ina finamira a lunga vista. Guardar da cursa a cursa e surtut sin sesez e betg sin auters. En 4 onns veglia el terminar cun success ses emprendissadi d'informaticher e fin lura avair fatg uschè in bun progress sin ils skis ed en sia tecnica, ch'i bastia da vegnir nominà en in cader da Swiss Ski.

RTR actualitad 07:00

Artitgels legids il pli savens

Scrollar a sanestra Scrollar a dretga