Urs Huber è e resta «mister» Bikemaraton dal Parc Naziunal. Il mountainbiker dal chantun Argovia ha gudagnà a Scuol gia per la setavla giada la cursa roiala dal Bikemaraton, 141 kilometers enturn il Parc Naziunal. Pervia dals resultats actuals na valeva Urs Huber betg pli sco favurit numer in. Ses concurrent il pli fervent Hansueli Stauffer ha mussà durant la stagiun meglras prestaziuns.
Tar sia cursa da chasa, il Bikemaraton, ha Urs Huber dentant ina giada dapli mussà a tuts il «maister». El ha gudagnà cun passa ina minuta avantatg avant Hansueli Stauffer. Terz es vegni Markus Kaufmann.
Tar las dunnas era Alexandra Zürcher la pli sperta. Ella ha savì defender sia victoria da la stagiun passada e gudogna ina ulteriura giada la cursa roiala enturn in Parc Naziunal. Segunda è vegnida Tanja Priller da la Germania.
Success svizzer er tar la cursa «Jauer»
La cursa «Jauer» è la segund lunga cursa dal Bikemaraton dal Parc Naziunal. Ella maina da Fuldera 107 kilometers fin a Scuol. Questa cursa ha era gudagnà in ciclist svizzer. Silvio Hug era il pli prest. Noel Schenkel e vegni segund e Gabriel Ossyra da la Germania terz.
La victoria tar las dunnas va a Debora Piana da l’Italia. Ursina Condrau è vegnida segunda e Céline Heldner terza.
Victoria indigena tar cursa «Livignasco»
Tar sia dieschavla participaziun al Bikemaraton dal Parc Naziunala gudogna Letizia Strimer dad Ardez per la segunda giada la cursa «Livignasco» da Livigno in Italia a Scuol en Engiadina Bassa. Letizia Strimer ha gudagnà solo cun in grond avantatg avant Patricia Stucky ch’è vegnida segunda. Sin plazza trais è splatschada Cornelia Graf.
La cursa dals umens sin questa distanza ha gudagnà Marcel Ender dal Principadi da Liechtenstein.
Partenza cun bun'atmosfera
Il bikemaraton ha cumenzà cun bell'aura e bun'atmosfera. Scuol, Fuldera, Livigno, S-chanf e Zernez – là han ils tuns da partenza tunà. 1'410 participantas e participants han fatg part a la cursa ch'ha manà enturn il parc naziunal.
