Siglir tar il cuntegn

Header

cuntegn

Maraton da skis engiadinais Désirée Steiner gudogna cursa da dunnas

La passlunghista dal cader B da Swiss Ski era la pli sperta tar la cursa da las dunnas. Désirée Steiner ha gudagnà la 21avla ediziun da la cursa avant la giuvna Maria Adele Zampa e Giuliana Werro da Zernez.

Suenter ina pausa da trais onns ha la cursa da las dunnas puspè gì lieu. La cursa da Samedan a S-chanf è il tun da partenza per l’emna da maraton cun il Maraton da skis engiadinais dumengia ils 13 da mars. A la cursa da las dunnas han fatg part passa 800 dunnas. Er sche betg pli uschè bleras dunnas han fatg part a la cursa sco anc avant la pandemia, èn ils organisaturs tuttina cuntents.

Sanestra
Legenda: Désirée Steiner (san.) gudogna la cursa da dunnas. Giuliana Werro vegn terza. RTR, Roman Dobler

Steiner, Zampa, Werro

Désirée Steiner da Tavau avant Maria Adele Zampa da Schlarigna e Giuliana Werro da Zernez: Quai è il podest da la cursa da quest onn. Davent da l’entschatta han surtut Giuliana Werro e la victura Désirée Steiner fatg tempo. Uschia è in quartet arrivà sin ils ultims kilometers ch'ha tranter ellas fatg or il podest. A la fin ha Désirée Steiner gì anc las pli bleras reservas. Ella gudogna cun in temp da 40 minutas e 48 secundas.

audio
Désirée Steiner, la victura da la cursa da dunnas
aus Actualitad vom 06.03.2022.
abspielen. Laufzeit 21 Sekunden.

Giuliana Werro trumpada

La premiera tar la cursa da las dunnas è ida a fin per Giuliana Werro cun la terza plazza. Perquai che la curridura dal cader C da Swiss Ski è surtut en acziun tar cursas da la cuppa d’Europa, n’ha ella anc mai pudì prender part a la cursa en sia stretga patria. Quest onn è il plan da termins dentant ì si, uschia ch'ella ha nizzegià la pussaivladad da far part a la cursa. Davent da l’entschatta ha Giuliana Werro fatg tempo, per gronda part ha ella dentant stuì far quai suletta, uschia ch'i mancava a la fin la forza per la victoria. L’emprim mument era ella, sa chapescha, trumpada, cun in zichel distanza sa po ella alura segira allegrar da la plazza da podest tar la cursa da dunnas.

audio
Intervista cun Giuliana Werro
aus Sport ed actualitad vom 06.03.2022.
abspielen. Laufzeit 2 minutas 2 Sekunden.

Cun Seraina Boner da Tavau (4.), Leandra Beck da San Murezzan (5.), Helena Guntern da Ftan (7.), Selina Bebi da Tavau (8.) e Fabiana Wieser da Sent (10.) èn pliras Grischunas tranter las diesch las pli sveltas.

Bilantscha organisatorica positiva

814 dunnas èn partidas per la cursa da dunnas e tuttas èn arrivadas a S-chanf. La partenza tar il center da sport Promulins a Samedan, la cursa sezza, dentant er il manaschi e l’organisaziun en l’arrivada a S-chanf han funcziunà senza incaps. La prova generala per la cursa dal Maraton la dumengia ils 13 da mars è pia grategiada.

audio
Bilantscha organisatorica cun Menduri Kasper
aus Sport ed actualitad vom 06.03.2022.
abspielen. Laufzeit 3 minutas 15 Sekunden.

Lung temp n’èsi betg stà segir sche ed en tge furma che las cursas da passlung popularas pon avair lieu. D’elavurar tut ils concepts da segirezza cun differentas variantas saja stà ina gronda sfida. Che las reglas da corona èn per gronda part vegnidas schliadas, fetschia vegnir tut pli simpel. La cursa da dunnas ha perquai pudì avair lieu sco usità.

RTR actualitad 07:00

Artitgels legids il pli savens

Scrollar a sanestra Scrollar a dretga