Ils buns resultats durant la stagiun passada han per consequenza che bleras skiunzas e skiunzs svizzers han pudì far il pass en in cader pli aut da Swiss Ski. Il sigl direct dal cader B en il cader naziunal han fatg Mélanie Meillard, Simone Wild e Niels Hintermann ch’ha tranter auter gudagnà la super-cumbinaziun da Wengen.
Luca Aerni e Mauro Caviezel han suenter lur triumfs als campiunadis mundials da skis a San Murezzan fatg il pass dal cader A en il cader naziunal. Aerni è era daventà a San Murezzan campiun mundial en la cumbinaziun alpina, Caviezel ha gudagnà en questa cursa la medaglia da bronz.
Grazia a las bunas prestaziuns en la cuppa mundiala tutga il dubel campiun mundial dals juniors Loïc Meillard da nov en il cader A. Sco el han era la Grischuna Jasmine Flury e Priska Nufer pudì far il pass dal cader B en il cader A. Plinavant èn nov atletas ed atlets vegnì dal cader C en il cader B da Swiss Ski.
RR novitads 15:00