Per Ornella Poltéra è il sport dapli che mo in hobi. Lantschà sia carriera sportiva ha ella cun il sport da passlung. Poltera ha era frequentà il gimnasi da sport a Tavau. Mo gia baud ha ella vesì che las cursas da passlung èn memia curtas. Cura ch’auters vegnivan gia al cunfin era il motor da la giuvna pir a chaud. Oz è il sport da passlung simplamain in grond hobi ed ella sa participescha sulet pli al maraton da l’Engiadina.
Maraton sut 3 uras
Sia gronda passiun è il sport da currer. Ils davos onns ha Poltéra er demonstrà tge classa ch’ella ha en quai sport, oravant tut sur las distanzas extremas. Ella è gia stada sin il podest al Swissalpine a Tavau, ina cursa da 78 kilometers sur culms e vals. Plinavant ha ella er gudagnà l’onn passà las cursas dal Transruinaulta e Transviamala. Per ina surpraisa ha Ornella Poltéra lura procurà il 2016 als campiunadis svizzers sur 100 kilometers a Bienna. En in temp sut nov uras ha ella cuntanschì l’arrivada sco segunda dunna e sco emprima en sia categoria. E dacurt è la giuvna da 26 onns currida l’emprima giada in maraton sut trais uras. Per ils 42,195 kilometers al city maraton da Vienna ha Poltéra duvrà 2:58:51 uras.
Poltéra Training
Trenadra persunala
Da professiun è Ornella Poltéra oz trenadra persunala a Domat. Il sport duai far plaschair, quai il motto da la giuvna sportista. Mintga trenament duai er esser in’aventura. Il pli gugent e sche pussibel trenescha ella giuadora. Per Ornella Poltéra è la natira la meglra arena per in trenament cumplet. Ed in sportist cumplet saja in sportist cun blera forza e cundiziun e vitiers ina buna coordinaziun. Poltéra na trenescha en emprima lingia betg sportists da classa, mabain persunas cun plaschair vid il sport, persunas che vulan er viver pli saun, mo ch’han franc era tschertas ambiziuns.
RR Sportissimo 17:00