Siglir tar il cuntegn

Header

audio
Swiss Epic 2021 è a fin: Facit e sguard enavant
Or da Actualitad dals 21.08.2021.
laschar ir. Durada: 04:44 minutas.
cuntegn

Mountainbike Flückiger e Rohrbach gudognan Swiss Epic

Il duo svizzer Lukas Flückiger e Nicola Rohrbach gudogna il Swiss Epic 2021. Els gudognan la finala cun in avantatg da 6:37 minutas sin il duo cun il Spagnol Francesc Guerra Carretero e l'Ollandais Hans Becking. Cumplettà il podest sco terz ha il duo cun il Svizzer Konny Looser e l'Ollandais Sören Nissen. Els han pers 21:09 minutas sin Flückiger e Rohrbach ch'han triumfà a quatter da las total tschintg etappas ch'han manà quest onn en las regiuns da San Murezzan e Tavau, quai sur ina distanza totala da 350 kilometers cun radund 12'000 meters differenza d'autezza.

Per Lukas Flückiger èsi gia il segund triumf. Il 2016 aveva el gudagnà il Swiss Epic tras il Vallais ensemen cun Reto Indergand. Avant in onn avevan gudagnà il Swiss Epic da Laax sur Arosa fin a Tavau il duo cun Nino Schurter e Lars Forster.

Legenda: da san. Robyn De Groot ed Ariane Lüthi mad

Ariane Lüthi e Robyn De Groot ina classa per sa sezzas

Tar las dunnas gudogna la Svizra Ariane Lüthi ensemen cun sia collega sidafricana Robyn De Groot. Ellas han dominà questa cursa dad A fin Z e triumfà a tuttas tschintg etappas. La finala han ellas gudagnà il Swiss Epic cun in avantatg da 19:17 minutas sin la Tudestga Adelheid Morath e l'Austriaca Angelika Tazreiter. Sin il terz plaz cun in retard da 32:05 minutas suonda il duo talian cun Costanza Fasolis e Claudia Peretti.

Andrin Beeli – meglier rumantsch al Swiss Epic

Ina buna prestaziun ha Andrin Beeli da Sagogn ensemen cun Matthias Stirnemann mussà a questa cursa d'etappas che vala sco ina da las pli diras cursas da mountainbike insumma. Malgrà plirs defects en las emprimas etappas han els terminà il Swiss Epic 2021 sin il 5avel plaz cun in retard da 31:02 minutas sin Lukas Flückiger e Nicola Rohrbach. La quarta etappa ha il duo svizzer schizunt terminà sin il podest sco terzs. Tant per Beeli sco er per Stirnemann èsi stà ina da las davosas grondas cursas da mountainbike sco profis.

audio
Andrin Beeli – success en ina da las davosas cursas sco profi
02:58 min, Actualitad dals 21.08.2021.
laschar ir. Durada: 02:58 minutas.

Happy End per Fadri Barandun

L'Engiadinais Fadri Barandun ha ensemen cun Vinzent Dorn da la Germania – suenter etappas cun plirs defects – terminà l'etappa finala a Tavau sin il terz plaz. Grazia a quest bun resultat en la davosa etappa han Fadri Barandun e ses collega Vinzent Dorn anc pudì far il pass sut ils top 10 dal classament general. La finala è il duo sa classà sin plaz 9 cun in retard da 1:22:49 uras sin ils victurs Lukas Flückiger e Nicola Rohrbach.

audio
Fadri Barandun sin il podest a l'etappa finala a Tavau.
04:51 min, Actualitad dals 21.08.2021.
laschar ir. Durada: 04:51 minutas.

Swiss Epic tras il Grischun fin il 2023

Er l'onn proxim maina il Swiss Epic, la cursa d'etappas, durant 5 dis tras il Grischun. Planisà è ina ruta da Laax sur Arosa fin a Tavau, in'ediziun sumeglianta sco quella dal 2020. Il Swiss Epic ha in contract cun il Grischun fin il 2023. Lura vegn manà atras la 5avla ediziun tras il chantun. Silsuenter è pussibel che questa cursa da mountainbike da pliras etappas turna enavos en il Vallais.

RTR novitads 14:00

Artitgels legids il pli savens

Scrollar a sanestra Scrollar a dretga