Cun questa terrada a Langenthal n'èsi betg propi stà da quintar. Suenter la clera victoria da 5:0 en l'emprim gieu da la seria da quartfinal, nua che Cuira ha dominà da A fin Z, era la persvasiun gronda da profitar dal schlantsch en il segund gieu da la seria. L'adversari dal chantun Berna ha dentant a partir da l'emprima minuta tegnì pitg al EHC Cuira. La decisiun è crudada en l'ultim terz, nua che Langenthal ha pudì far ord in 2:2 in 4:2. Ils dus gols per l'equipa grischuna ha Jan Simon Marha fatg, omadus en il segund terz dal gieu. En la seria da quartfinal statti uschia pari 1:1.
Vinavant cun la seria da Best-of-5 en la MyHockey League vai gievgia saira a Cuira. Gudognan ils Grischuns la seria èsi fix ch'els dumognan la promoziun en la Swiss League, la segund auta liga svizra. Il motiv è che nagin autra squadra ha fatg la dumonda da licenza per la Swiss League.
Terrada er per Arosa
Er Arosa ha pers ses gieu da quartfinal dals playoffs, quai a chasa cunter Seewen cun 1:4. Il sulet gol per Arosa ha Stefan Diezi fatg curt avant la fin. En questa seria maina il club soloturnais da Seewen cun 2:0.
