EHC Arosa – EHC Frauenfeld
L'EHC Arosa ha gudagnà la partida cunter l'EHC Frauenfeld, ch'era l'emprim da la tabella e quai cun 3:2. Suenter il segund terz stevi 2:2 ed il gol decisiv è crudà en il davos terz. Fatg quel ha Valentino Varano en la 52avla minuta.
EHC Cuira – EHC Bülach
Era l'EHC Cuira ha pudì recaltgar 3 puncts. Il club grischun ha gudagnà cunter l'EHC Bülach cun 4:2. Gia suenter l'emprim terz manava Cuira cun 2:1. Ils dus ulteriurs gols ha il club grischun lura fatg en il segund terz.
Sguard enavos sin la stagiun passada
Omadus equipas grischunas da la MyHockey League han persvadi la stagiun passada durant la qualificaziun. Il EHC Cuira ha terminà la qualificaziun sin plazza dus, il EHC Arosa sin plazza trais. «Sin il mund» u meglier detg enavos en la realitad è il EHC Cuira crudà en ils playoffs. Alura cura che i va per la liongia ha Cuira desdi. L’equipa dals trenaders Reto e Jan Von Arx ha pers gia en l’emprima runda da playoff ed è crudà or da la decisiun.
Il project da manar il EHC Cuira enavos a la testa da la My Hockey League dovra anc in zichel peda. Puspè ha la squadra sa midada fitg ferm. Ed ils frars Von Arx lavuran vinavant vi da l’equipa che vuless a la fin puspè esser cumpetitiva. Almain en la terz auta liga da hockey svizra. Ins sa spetgar che la squadra è puspè tranter las meglras quatter da la liga.
