Il biatlet da Trun Eligius Tambornino ha persvadì cun il 14avel plaz en il sprint da la sonda. En la cursa da persecuziun da la dumengia è Tambornino dentant crudà enavos sin il 26avel plaz. Suenter la mesadad da la cursa e duas giadas sajettar en venter er’il Sursilvan anc 8avel. En pe èn lura dentant capitads gist 5 sbagls e quai ha franà Tambornino sin via ad in plaz sut ils top 10 avant ils fans da chasa.
Aita Gasparin da 29 sin 18
Meglier èsi ì ad Aita Gasparin en la cursa da persecuziun. Suenter il 29avel plaz en il sprint ha ella pudì far in pass enavant fin sin il 18avel plaz. La sora giuvna da las Gasparin ha oravant tut persvadì en il stan da sajettar. Da 20 sajets n’ha Aita Gasparin be ina suletta giada betg tutgà la schiba.
Gudagnà las cursas da persecuziun da la Cuppa IBU a Lantsch han la Russa Uliana Kaisheva tar las dunnas ed il Franzos Antonin Guigonnat tar ils umens.
Organisaturs èn cuntents
Il president dal comité d’organisaziun, Silvio Baselgia, fa ina bilantscha positiva suenter las emprimas cursas internaziunalas da biatlon a Lantsch. El haja er survegnì in bun resun da la IBU e dals atlets. Ussa saja da lavurar vinavant e restar sin quella via per ina giada pudair organisar cursas da la cuppa mundiala en la nov’arena da biatlon a Lantsch.
Durant ils dis da Bumaun è a Lantsch gia la proxima gronda concurrenza da sport. Lura figurescha durant gist trais dis il Tour de Ski a Lantsch.
RR Sportissimo 17:00
