Siglir tar il cuntegn

Header

audio
Discurs cun Paul Duff davart il viadi en il Nepal 2019.
Or da Sportissimo dals 07.06.2020.
laschar ir. Durada: 20:35 minutas.
cuntegn

Nepal Paul Duff sin viadi sin il tetg dal mund

L’atun passà è Paul Duff da Segnas (70) viandà tras il Dolpo en il Nepal, in viadi organisà dal guid da muntogna David Berther da Segnas. Durant 25 dis è la gruppa dals otg Svizzers viagiada tras ina regiun magica e misteriusa, fascinanta da flora e fauna circumdada dals pli auts culms dal mund.

Accumpagnà la gruppa cun Paul Duff han 15 gidanters indigens, per gronda part sherpas, e bun 20 animals, mils, asens ed ina chaval ch’han transportà tut la rauba, da tendas fin la cuschina d’in lieu a l’auter. Senza l’agid dals sherpas e lur animals na fissi betg pussibel da far in tal viadi di Paul Duff.

Dolpo – ina regiun pauc sviluppada

La regiun dal Dolpo sa chatta en il nord-vest dal Nepal e sa zuppa davos la chadaina da muntognas dal Dhaulagiri e da l’Annapurna. 80% dal territori schai sur 4’000 meters sur mar. Il Dolpo saja ina regiun pauc sviluppada, era perquai ch’ins possia vitiers mo cun ir sur pass e tras chavorgias, uschia Paul Duff. La glieud na possedia betg bler en questa regiun e vivia fitg simpel.

Sin quest viadi ch’ha cumenzà a Juphal, bun 300 kilometers en il nord-vest da Kathmandu, la citad principala dal Nepal, ha la gruppa stuì surmuntar plirs pass sur 5’000 meters sur mar. Mintga di èn els ì a pe tranter set e nov uras, ina giada schizunt fin a 12 uras. Durant quest viadi han Paul Duff e collegas vesì fitg bler ed er vegnì en contact cun blers indigens. Ils Nepalais sajan fitg averts, cordials e cuntents. Grazia a l’agid dal sherpa Thsiring che discurra tant englais sco er nepalais e tibetan hajan els era pudì communitgar cun la glieud che viva en quella regiun dal Dolpo di Paul Duff.

Charta geografica dal Nepal
Legenda: charta geografica dal Nepal .

Sportissimo 17:00

Artitgels legids il pli savens

Ir a sanester Ir a dretg