Siglir tar il cuntegn

Regiunal Nevin Galmarini – pront per la nova stagiun

La davosa stagiun è stada la meglra da Nevin Galmarini. Uss vul il snowboardist alpin cuntinuar sin quest livel.

Purtret da Nevin Galmarini.
Legenda: Nevin Galmarini ha gì ina buna stagiun l'onn passà. Ussa vul el cuntinuar cun ses success. ANR, Benedict Stecher

La davosa stagiun è stada la meglra stagiun dal snowboardist Nevin Galmarini. Per l’emprima giada ha il sportist ch'abita ad Ardez gudagnà ina cursa da la cuppa mundiala. Ina segunda medaglia ha el gudagnà tar il campiunadi mundial en Sierra Nevada. Ed era sia rangaziun sin il quart post tar la cuppa mundiala generala ha persvadì.

Cun buna speranza parta il snowboardist alpin quest’emna en la nova stagiun. Ina stagiun cun punct culminant en favrer – ils gieus olimpics a Pyeongchang en la Corea dal Sid. Galmarini ha avisà in'ulteriura medaglia. Suenter la medaglia d’argient tar ils gieus olimpics a Sotchi e quella dal campiunadi mundial en Sierra Nevada vul Galmarini era en la Corea dal Sid brigliar.

Emprim mussar bunas prestaziuns en la cuppa mundiala

Suenter avair cuntanschì la quarta plazza da la cuppa mundiala generala da snowboard da l'onn passà, vul Nevin Galmarini far il proxim pass – il pass sin il podest. Da terminar la rangaziun da l’entira stagiun perfin sin plazza dus u lura sco emprim fiss anc meglier.

La cuppa mundiala generala è per mai fitg impurtanta.
Autur: Nevin GalmariniSnowboardist Ardez

Galmarini vul ir cun snowboard sco la stagiun vargada, dentant era far in ulteriur svilup. Era la concurrenza na dorma betg. Tuts lavuran anc pli intensiv vi dals detagls, perquai na vegni segir betg pli simpel.

Las emprimas cursas da la cuppa mundiala da snowboard alpin èn a Carezza en las Dolomitas. Suenter spetgan cursas a Cortina d’Ampezzo.

RR actualitad 17:00