Nino Schurter ha dominà la disciplina da cross-country ils davos passa 10 onns ed ha gudagnà tut quai ch’i dat da gudagnar en ses sport. Er cun 36 onns è el il numer 1 dal mund: Ni la vegliadetgna ni blessuras sco la stagiun passada suenter sia cupitgada a Snowshoe vegnan da franar il Lumnezian.
Nino Schurter è in fenomen e vegn er titulà sco Roger Federer dal mountainbike. Sper ses talent lavura il Lumnezian però er per ses success, quai fitg conscienzius ed acribic. Schurter è ina persuna sensibla ch’è malgrà tut ils success adina stà cun ils pes sin terra. Sia gronda fermezza, sper il mental, è ch’el vegn adina puspè da clamar giu sia meglra prestaziun cura ch’i va per titels e medaglias: Pli fitg che Nino Schurter è sut squitsch e meglra sia prestaziun.
Per avair in tal success sto l'entir team dar 100%. L’equipa da Thomas Frischknecht è sco ina famiglia per Nino Schurter, ina famiglia che armonisescha e che dat tut per il mountainbike. Las persunas las pli impurtantas en l’equipa da Nino Schurter èn sper il schef d’equipa Thomas Frischknecht franc sia fisioterapeuta tudestga Julia Hegar e ses mecanist Yanick Gyger che lavura dapi in decenni cun il campiun lumnezian.