Siglir tar il cuntegn

Header

audio
MTB e Corona – Nino Schurter davart la stagiun difficila 2020.
Or da Actualitad dals 27.07.2020.
laschar ir. Durada: 03:40 minutas.
cuntegn

Nino Schurter «Per mai n’è la situaziun betg dramatica»

La pandemia da corona ha mess l’entira scena da mountainbike sin il chau il 2020. Insatge n’è dentant betg sa midà, l’ierarchia tar ils profis. Nino Schurter ha en sias emprimas cursas en questa stagiun demonstrà ch’el è anc adina il meglier mountainbiker dal mund.

Cun gudagnar ses 9avel titel da campiun svizzer a Gränichen ha Nino Schurter er triumfà a pli probabel in dals sulets puncts culminants da questa stagiun. La proxima giada va il mountainbiker a la partenza al Swiss Epic, ina cursa cun tschintg etappas che maina quest onn per la segunda giada tras il Grischun, da Laax sur Arosa, fin a Tavau. Silsuenter saja da prender tut sco i vegnia, di Nino Schurter. Sch’i dat anc cursas da la cuppa mundiala ed ils campiunadis mundials da mountainbike en l’Austria ch’èn ina giada planisads l’entschatta october, quai stat tut anc sin chommas falombras.

Per mai n’è questa situaziun da corona betg uschè dramatica, jau hai gì mes success e mes bels muments en il sport.
Autur: Nino Schurtercampiun olimpic e campiun mundial

L'Uniun da ciclissem internaziunala UCI sco era ils organisaturs da las cursas en Svizra emprovan da salvar anc intginas cursas en questa stagiun. Cursas cun millis da fans sco quai ch’ins ha tranter auter er vis ils davos onns a las cursas da la cuppa mundiala a Lai, quai è dentant «tempi passati», almain en quella stagiun. Pussibel è sulet anc da realisar cursas en il stil sco ils campiunadis svizzers a Gränichen nua ch’igl è vegnì cumbattì per titels senza fans ed aspectaturs. Mintga atlet ha er dastgà avair cun el sin l’areal da cursa sin il pli dus supporters.

Sche quai fiss adina uschia na fiss quai propi betg cool. Per il mument è quai dentant il meglier ch’ins sa far.
Autur: Nino Schurtermountainbiker

Co vinavant na sa nagin

Nino Schurter spera fitg che la crisa da Corona varghia tant pli spert e ch’els possian bainbaud puspè cumbatter avant fans ed amis dal sport da mountainbike.

Per ils giuvens n’è questa situaziun da corona betg simpla. Jau sper ch’els chattian tuts in’equipa, sponsurs e vegnian bain sur quest temp ora.
Autur: Nino Schurter34 onns

Con ditg ch’i va uschia vinavant na sa nagin. Forsa tucca la crisa da corona er anc ils gieus olimpics da Tokyo ch’èn gia vegnids spustads per in onn sin la stad 2021. Là vuless Nino Schurter gugent defender ses titel da campiun olimpic. Il mument na sajan ils gieus olimpics dentant betg uschè preschent, ma ina giada ch’i saja fix che quels gieus hajan lieu saja ses focus puspè cumplettamain sin questa cursa, uschia il campiun mundial e campiun olimpic Nino Schurter.

Actualitad 08:00

Artitgels legids il pli savens

Scrollar a sanestra Scrollar a dretga