Damai che l’enviern è arrivà tard l’onn passà ha Nino Schurter pudì trenar ditg giuadora sin il mountainbike. Il december è il sportist da 28 onns lura stà a Rio de Janeiro en la Brasilia per trenar e per survegnir las emprimas impressiuns da la cursa olimpica da la stad 2016. Quest onn ha Schurter cumenzà cun in camp da trenament en l’Africa dal Sid e dacurt è el stà en la California. Là ha Nino Schurter er absolvì las emprimas cursas ch’el ha er mintgamai gudagnà.
Nov vent en l’equipa
Durant il camp da trenament il favrer en l’Africa dal Sid, sia regiun preferida, ha Nino Schurter oravant tut trenà cun ses nov collega d’equipa, il giuven ollandais Michiel van der Heijden. Ils davos 10 onns ha Schurter adina gì Florian Vogel da sia vart, ussa ha surpiglià quella rolla van der Heijden, il campiun mundial dals U23. Cun Andri Frischknecht, il figl dal schef d’equipa Thomas Frischknecht e la svedaisa Jenny Rissveds figureschan anc dus ulteriurs giuvens en il Scott Racing Team. Durant che Nino Schurter è stà ditg il giuven en l’equipa è el ussa il pli rutinà e «bab» da quest team.
Gudagnar enavos dus titels
Suenter che Nino Schurter ha fatg in intermezzo sin via la stagiun passada cun parter al Tour de Romandie ed al Tour de Suisse metta el quest onn il focus cumplainamain sin il mountainbike, sin la disciplina cross-country. E las finamiras èn cleras. Schurter vul gudagnar la cuppa mundiala generala sco er il titel da campiun mundial l’entschatta settember ad Andorra.
Omadus titels ha el pers la davosa stagiun encunter il franzos Julien Absalon. Ils patratgs èn dentant er gia vid il grond punct culminant dal 2016, ils gieus olimpics a Rio de Janeiro. En bun in onn e mez vul Nino Schurter daventar en la Brasilia campiun olimpic ed uschia gudagnar la medaglia dad aur, quest davos titel che manca anc en ses palmarès. Il 2008 vev’el gudagnà a Peking la medaglia da bronz ed als davos gieus olimpics il 2012 a Londra la medaglia d’argient.
Cursa da chasa a Lai
En la stagiun 2015 datti sulet sis cursas da la cuppa mundiala. Las emprimas duas cursas èn la fin matg a Nove Mesto en Tschechia ed ad Albstadt en Germania. In dals puncts culminants per Nino Schurter suonda lura ils 5 da fanadur. Quai di organisescha Lai per l’emprima giada ina cursa da la cuppa mundiala, igl è la cursa da chasa da Nino Schurter. Parter avant ils agens fans e quai en ina uschè impurtanta cursa saja fitg bel e spezial di Schurter.
Gudogna Nino Schurter quest onn almain trais da las sis cursas da la cuppa mundiala egualisass el era il record da ses schef d’equipa Thomas Frischknecht ch’ha gudagnà en sia carriera 17 cursas, Schurter ha gudagnà fin oz 14 cursas. Il record mundial tegn il franzos Julien Absalon cun 29 victorias.
Absalon resta il grond concurrent
Per cuntanscher sias finamiras sto Nino Schurter oravant tut batter ses grond rival il franzos Julien Absalon. Il dubel campiun olimpic ha gudagnà l’onn passà a Hafjell en la Norvegia per la 5avla giada il titel da campiun mundial. Plinavant ha Absalon er gudagnà il 2014 per la 6avla giada la cuppa mundiala generala. Tenor Nino Schurter è Julien Absalon, il meglier mountainbiker da l’istorgia, er en questa stagiun quest sportist che pudess far il pli grev ad el. In ulteriur favurit quest onn pudess er esser è il tschec Jaroslav Kulhavy, il campiun olimpic da Londra.
