-
Bild 1 von 3. Trenament da lutga a Crusch, Sent. Bildquelle: RTR, Roman Dobler.
-
Bild 2 von 3. En ina stalla è il nov local da lutga. Bildquelle: RTR, Roman Dobler.
-
Bild 3 von 3. Giuvens durant il trenament da lutga. Bildquelle: RTR, Roman Dobler.
Dapi in onn treneschan insaquants giuvens lutgaders il sport da la lutga a Sur En a Sent. L’anteriur lutgader regiunal e trenader Jon Fadri Carpanetti mussa la lutga ad ina dunsaina giuvens da la regiun. Gia l’atun ed alura surtut durant ils mais d’enviern eran ils lutgaders d’Engiadina Bassa a la tschertga d'in local per trenar quest sport er durant ils mais fraids. A Crusch, en la fracziun da Sent, gist sper via han els ussa chattà in local e drizzà en quel sco simpel local da lutga.
Stalla da nursas è uss local da lutga
En ina veglia stalla da nursas han ils giuvens lutgaders chattà lur local. En atgna reschia han ils giuvens drizzà en quel ensemen cun il trenader e cun ils geniturs. L’emprim han els svidà la stalla da nursas e suenter fatg il plaz da lutga cun in mantun resgim. Enturn il plaz da lutga protegian matratschas da feridas. Silsuenter han els isolà la stalla ed anc installà in uder per bagnar il resgim e per sa lavar in zichel. Ussa mancan en sasez mo pli las aissas che tegnan ferm l’isolaziun ed in stgaudament.
L’emprim mo in pugn plain, uss ina dunsaina
Il trenament da lutga a Sur En da Sent aveva cumenzà be cun in pugn plain giuvenots da la regiun. Uss, suenter in onn fa gia ina dunsaina part a la gruppa che s’entaupa mintga mesemna per far la lutga. La finamira en Engiadina Bassa è da pussibilitar als giuvens d'emprender quest sport e sa chapescha dad ir alura ad ina u l’autra festa da lutga sco l'entschatta d’avrigl a la festa da primavaira a Cazas.