Siglir tar il cuntegn

Header

Navigaziun

Il Thömus RN Swiss Bike Team 2019. Da san. Vital Albin, Ursin Spescha, Alessandra Keller, Kathrin Stirnemann e Mathias Flückiger
Legenda: Il Thömus RN Swiss Bike Team 2019. Da san. Vital Albin, Ursin Spescha, Alessandra Keller, Kathrin Stirnemann e Mathias Flückiger Andreas Wieland
cuntegn

Regiunal Nov team per Vital Albin ed Ursin Spescha

Ils dus mountainbikers sursilvans, Vital Albin ed Ursin Spescha, partan da nov per l’equipa da Ralph Näf, il Thömus RN Swiss Bike Team. Per omadus èsi l’emprima giada ch’els èn sut tetg tar in’equipa da profis.

Ils davos quatter onns èn Vital Albin ed Ursin Spescha che partan anc en la categoria dals U23 stads commembers dal Bike Team Soloturn. En vista a la nova stagiun hai dà ina roschada. En il nov team da l’anteriur profi e campiun mundial Ralph Näf daventan ils dus sursilvans collegas d’equipa da Mathias Flückiger e las duas dunnas Alessandra Keller e Kathrin Stirnemann.

Collegas d’equipa da gronda classa

Il Thömus RN Swiss Bike Team vala sco ina da las fermas equipas insumma. Cun Mathias Flückiger han Vital Albin ed Ursin Spescha in atlet en il cader ch’ha gia festivà gronds success ed auda tranter ils megliers dal mund. Flückiger è stà campiun mundial tar ils U23 ed ha gudagnà la stagiun passada sia emprima cursa da la cuppa mundiala. Alessandra Keller ha gudagnà il 2018 tut quai ch’ins po gudagnar tar las U23 e vala sco ina da las grondas speranzas svizras per l’avegnir. E Kathrin Stirnemann ha er gia gudagnà plirs titels tar l’elita.

Albin e Spescha pon trenar en Surselva

Il camp da basa da l’equipa da Ralph Näf è Muster. Il nov ressort da vacanzas Disentis Catrina Experience è numnadamain il nov partenari dal Thömus RN Swiss Bike Team. Uschia pon omaduas parts profitar ina da l’autra. L’equipa da mountainbike po trenar a Mustér sut cundiziuns spezialas e la regiun da Mustér e conturn duai uschia vegnir pli populara per il sport da mountainbike. La finamira è che Mustér daventia in dals meccas dal sport da mountainbike en Svizra e possia uschia carmalar er durant la stad dapli turists en la regiun, oravant tut famiglias.

RR actualitad 08:00