Tar ils umens ha l’Ucrain Glyva Evgenii triumfà en in temp da bun 6 uras, 31 minutas e 51 secundas avant Dimitri Tsiganov da la Russia e Vajin Armstrong da la Nova Zelanda. Il svedais Jonas Buud ch’aveva gudagnà ils ultims 8 onns n’è betg partì pervia d’ina blessura. Meglier svizzer è Daniel Bolt vegnì sco 5avel.
La cursa roiala dal swissalpine ha manà da Tavau via Filisur a Bravuogn tar la chamona dal Kesch e sur il Pass dal Sertig enavos a Tavau.
Ornella Poltéra da Sagogn gudogna la cursa S42
Al swissalpine datti diversas cursas tranter 10 e 78 kilometers. Ina novaziun a chaschun dal 30avel swissalpine è la cursa S42 sur ils pass da Scaletta e Sertig. Gudagnà la premiera da quella cursa ha Ornella Poltéra da Sagogn. Ella leva atgnamain currer il K78. Pervia d’ina blessura dal schanugl n’ha el betg pudì trenar tant ed è persuenter currida il S42.
Igl è l’emprima gida ch’ella è currida in maraton da muntogna en la distanza classica da 42 kilometers ed Ornella Poltéra ha gest gudagnà quel.
Bunamain 5’400 curridras e curriders èn sa participads ad ina da las diversas cursas dal swissalpine da giubileum.
