Sco emprim ha il club dà tennis sin las plazzas dal Disentiserhof. Dentant gia in onn suenter la fundaziun èn vegnidas construidas duas plazzas da tennis ad Acla da Fontauna. Dus onns pli tard èn duas ulteriuras plazzas suandada là ed uschia ha era il center da sport cumenzà a prender conturas. Il 1974 è il club sa participà l’emprima giada al campiunadi d’Interclub e dus pli tard ha el avert sia scola da tennis. Quai saja stà l’entschatta d’in grond svilup di Ronny Zanin che presidiescha il club dapi passa dus onns.
I suonda la participaziun d’equipas da junioras e juniors al Interclub ed il 1979 organisescha il Club da tennis Mustér per l’emprima gia il Campiunadi grischun da tennis.
In impurtant term en l’istorgia dal club è segir era stada l’avertura da la halla da tennis l’onn 1980. Il manaschi da tennis vegn lura pir endretg en moviment. Plazzas da tennis en il hotel Baur, tranter auter l’emprima plazza da tennis sin pastget en Svizra, èn suandadas. L’infrastructura cun in tozzel plazzas da tennis ha procurà per in vair boom da tennis sisum la Surselva.
Ils stars vegnan a Mustér
Il Club da tennis Mustér sa posiziunescha ils onns 80 pli e pli era sin plaun naziunala ed internaziunal. Sper l’organisaziun dal Cup Cristal cun enfin 150 participantas e participants, reusseschi era als exponents dal club da persvader ils organs da tennis svizzers da las premissas e l’infrastructura per concurrenzas internaziunalas.
Il 1984 po il club organisar la partida da la Cuppa Davis tranter la Svizra ed il Senegal. Stads da la partida èn giugaders prominents sco Jakob Hlasek, Roland Stadler u Markus e Heinz Günthardt.
Be in onn pli tard suonda in ulteriur punct culminant en l’istorgia dal club. Il 1985 sa participescha la giuvna Monica Seles cun l’equipa da la Jugoslavia a la Copa del Sol da las junioras a Mustér. Seles è pli tard daventada in dals gronds stars sin la tribuna da tennis ed ha gudagnà 9 turniers da Grand Slam ed è stada durant 178 emnas il numer 1 dal mund.
Success en l’Interclub
Era ils indigens han dentant fatg furora en quels 50 onns cun lur equipas d’Interclub. Il 1997 è l’equipa dals seniors giuvens schizunt sa promovida en la liga naziunala C. Enturn l’onn 2010 ha l’activitad dal club cumenzà a tschessar. D’ina vart è la demografia negativa cun annadas d’uffants bler pli pitschnas sa fatgas vesaivlas, da l’autra vart è la concurrenza d’auters sports daventada pli gronda. Ils megliers onns dumbrava il Club da tennis Mustér tschintg equipas activas e duas squadras da juniors d’Interclub.
Ils davos onns, principalmain suenter la pandemia da corona, hajan ins dentant puspè pudì gudagnà bain intgins commembers novs, di Ronny Zanin. Oz dumbra il club circa 65 commembras e commembers. Creschì è era puspè il dumber da junioras e junioras che frequentan ils curs dal club.
Or da l'archiv