Orlik Armon – in garant per spectacul

Sin il pli tard dapi la festa da lutga federala ad Estavayer-le-Lac la fin avust da l’onn passà è Armon Orlik ina da las grondas figuras en il sport da lutga. Il giuven da 21 onns sa mova dapi passa in onn sin in’unda da success e gudogna festas da lutga en seria.

Il 2017 ha Armon Orlik cumenzà cun il medem schlantsch sco quai ch’el ha terminà la stagiun passada. Quatter festas da lutga – quatter giadas sa numna il victur; Orlik Armon. La fin avrigl ha Orlik tranter auter triumfà a la festa da lutga dal chantun Turgovia ed uschia pudì defender ses titel da l’onn passà. Sia davosa terrada è stada quella encunter il retg Matthias Glarner en la lutga finala da la festa federala ad Estavayer, ina terrada ch’il giuven da 21 onns ha pudì magunar bain sco quai ch’el ha ditg.

«  Jau hai tratg mias consequenzas ord la terrada ad Estavayer ed jau sai co i va e co i na va betg. »

Armon Orlik
lutgader da l'onn 2016

Durant l’enviern ha Armon Orlik danovamain investì fitg bler temp en il sport da lutga, oravant tut ha el trenà dapli sin cundiziun, in dals impurtants facturs sper la forza e la tecnica. In ulteriur impurtant factur saja l’aspect mental. Orlik ha il davos onn er demonstrà con ferms ch’el è en il chau. Il lutgader da Maiavilla entra adina fitg concentrà e focusà en l’arena.

«  Armon è il mument in dals lutgaders il pli cumplets en il resgim. »

Stefan Fausch
anteriur lutgader da classa

Durant che Armon Orlik era disà cun mo paucs aspectaturs durant sias concurrenzas da judo, cun quest sport ch'il lutgader da 113 kilos ed 1.90 meters gronds ha lantschà sia carriera sportiva, èsi oz plirs tschients, schizunt millis che persequiteschan ses cumbats. E dapertut nua che Orlik sa participescha regia euforia ed il spectacul è per il pli garantì.

Unspunnen 2017

Malgrà ses mo 21 onns po Armon Orlik gia preschentà in grond palmarès. Sper cuntanscher la lutga finala a la davosa festa federala nua ch’i ha dà ses emprim cranz federal, ha Orlik gia gudagnà otg festas da cranz. Tranter auter ha el triumfà l’onn passà sin la Schwägalp e gudagnà la festa da la Svizra dal nord-ost. Grazia a quest success ha il giuven lutgader da Maiavilla è gudagnà il titel sco «lutgader da l’onn 2016”. Plinavant è el vegnì onurà l’onn passà sco il “newcomer da l’onn 2016” da tut ils sportists en Svizra.

Gronda finamiras ha Armon Orlik er en questa stagiun. Il punct culminant è franc la festa d’Unspunnen, ils 27 d’avust ad Interlaken. Questa festa è mo mintga sis onns ed ha uschia in sumegliant caracter sco la festa federala. Pudess Orlik triumfar a la festa d’Unspunnen lura fiss la terrada d’Estavayer encunter Matthias Glarner emblidada e sutterrada, manegia Orlik.

NOS a Tavau

Sper la festa d’Unspunnen sa legra Armon Orlik da sa participar a las festas da lutga sin il Brünig, sin la Schwägalp ed a la festa chantunala bernaisa. Là sa metta el viaden en la tauna dals lufs cun tuts ils ferms lutgaders bernais. Mussar sia gronda classa vul Orlik dentant era a la festa da lutga da la Svizra dal nord-ost en la halla da glatsch a Tavau. A questa festa sa participescha Armon Orlik sco defensur dal titel.

RR actualitad 08:00