Siglir tar il cuntegn

Header

audio
Discurs cun Seraina Derungs davart ses viadi sin il PCT 2019.
Or da Sportissimo dals 06.06.2020.
laschar ir. Durada: 19:17 minutas.
cuntegn

Pacific Crest Trail Seraina Derungs a pe tras ils Stadis Unids

Durant passa 5 mais è Seraina Derungs dad Uors en la Lumnezia ida a pe dal cunfin dals Stadis Unids da l’America ed il Mexico fin al cunfin tar il Canada a l’ur da Manning Park a British Columbia. Ella ha absolvì bun 3’750 kilometers dals total 4’279 kilometers dal Pacific Crest Trail (PCT).

L’entschatta d'avrigl 2019 è Seraina Derungs sgulada vers l’America per sa metter en in’aventura tut speziala. Dals 9 d’avrigl fin ils 17 da settember è la giuvna Lumneziana viandada cun satgados sin quest trail en il vest dals Stadis Unids. Cumenzà ha il viadi a Campo en il sid da la California. Fin al cunfin dal Canada maina il viadi er tras ils stadis dad Oregon e Washington. Il pli aut punct da questa tura è cun 4009 meters sur mar il pass Forester en la California.

Quella damaun ch’jau hai entupà in urs hai jau gì tanta tema, che jau ma sun dumandada tge fas propi qua.
Autur: Seraina Derungsredactura social RTR

Adina pli lunsch

Seraina Derungs ch’ha oz 33 onns ha cumenza il viadi patgific cun far di per di bun 10 miglias, pia bun 16 kilometers. A la fin da ses viadi saja ella dentant bain savens ida 30 miglias a di a pe (bun 50 kilometers) per arrivar al cunfin cun il Canada. Persula saja ella mai propi stada, ella haja entupà blera ed interessanta glieud che haja medemamain fatg quest viadi, di Seraina Derungs.

Pacific Crest Trail
Legenda: Il Pacific Crest Trail maina tras il vest dals Stadis Unids da l'America. www.pcta.org

Cun il minimum sin viadi

Sin quest viadi ha Seraina Derungs passentà passa 5 mais ora en la natira, per gronda part davent da la civilisaziun. Motivà da far quest viadi haja ella er il film «Wild», in film che sa tracta d’ina giuvna ch’ha fatg sac e pac e vivida per lung temp en ina cuntrada selvadia, er per metter d’in maun tut ses quitads e problems. Seraina è viagiada cun in satgados cun il minimum. Betg mancà n'ha sa chapescha il satg da durmir, in buglider da cuschinar cun gas, resti, aua e mangiativas e la camera per documentar quest viadi.

Insanua mal hai jau gì mintga di, l’entschatta vid ils pes, a la fin vid l’entir corp.
Autur: Seraina Derungs33 onns dad Uors en Lumnezia

Malgrà ils strapatschs faschess Seraina Derungs oz cun in zic distanza puspè in tal viadi. I restia numnadamain immens bler enavos. Ma suenter passa 5 mais saja ella era stada cuntenta da puspè pudair turnar a chasa, enavos en la civilisaziun e simplamain seser giu e na far nagut pli.

Sportissimo 17:00

Artitgels legids il pli savens

Ir a sanester Ir a dretg