Gudagnà il final da la cuppa mundiala da parasgular 2021 ha suenter otg sgols u otg pensums, uschenumnads tasks, il Franzos Luc Armant avant il Talian Aaron Durogati. Cumplettà il podest sco terz ha il Bernais Adrian Hachen ch’è uschia stà il meglier svizzer.
Igl è stà bellezza, dentant strentg e fitg pretensiuns. Perquai sun era cuntent ch’igl è dumagnà.
Ina buna prestaziun ha er il sulet parasgulader rumantsch, l’indigen Remo Maissen da Rabius mussà. El ha terminà questa concurrenza sin il 24avel plaz ed è uschia classà tranter la crème de la crème internaziunala da parasgular.
Mustér e regiun vala sco in dals Meccas per parasguladers. Davent dal territori da skis a Mustér po vegnir sgulà en tuttas direcziuns. I saja ina regiun fitg cumplexa nua ch’ins possia sgular fitg blers differents pensums, uschia Remo Maissen che sa legra uss era da prender in zic pli pacific e sgular il proxim temp puspè persuls e senza squitsch.