Minimum la mesadad è stà da currer en il stil classic, il rest han ins pudì currer en il stil liber. Radund 60 curridras e curriders èn stads a la partenza, ina gronda part si da la Bassa. Las gruppas ch’han dumagnà tranter las 10.00 e las 17.00 uras ils 100 kilometers han dastgà turnar a chasa cun in certificat dad aur. Er per ils auters hai dà in certificat, in d’argient.
I n’è dentant betg stà en emprima lingia in di da cursa, mabain in di da passlung. Star da cuminanza, discurrer in cun l’auter, simplamain passentar in bel di, quai la finamira da questa concurrenza. Ils participants han er dastgà giudair durant l’entir di ina buna cuschina. En las localitads da la Societad da tir Desertina è vegnì purschì da tuttas sorts tschaveras, schuppa, liongias, plattas fraidas e suenter la cursa spaghettis. Sa chapescha hai er dà petta e café durant l’entir di.
Mintga curridra e currider ha en mintga cas passentà in bel di a Mustér Fontanivas, malgrà ch’igl è stà da morder e stuschar ti mordio per dumagnar ils 100 kilometers en 7 uras. Igl ha navì durant l’entir di, las cundiziuns pulitamain plaunas, uschia ch’ils participants èn era stads huslis cun unscher ils skis mintgamai durant ch’il collega era sin loipa vid far rundas.
RR Sportissimo 17:00