Davos l’organisaziun da quests campiunadis grischuns na stat per ina giada betg in club u in’uniun, mabain ina societad privata che sa cumpona principalmain da geniturs d’atletas ed atlets dal SST, il Schneesport Team Surselva. Damai che nagins clubs han vulì surpigliar quests campiunadis grischuns sajan els sa mess ensemen per metter sin pes quest’occurrenza, uschia Paul Schmed da Breil. Ensemen cun Ester Vonplon, la scheffa nordica dal SST e l’anteriura scheffa Esther Nufer hajan els dentant duas persunas en il comité cun blera experientscha, uschia Paul Schmed vinavant.
Quittads fa però la mancanza da naiv. Il mument saja la situaziun anc buna, di Paul Schmed. E speranza dat er il fatg che passa la mesadad dal traject sa chatta en la sumbriva ed il rest en in plaun nua che la naiv tegna bler pli ditg.
In plan b na datti betg. Sche las relaziuns na lubeschan betg da manar atras las cursas lura na datti nagins campiunadis grischuns.
La mesemna, trais dis avant ils campiunadis grischuns, decida il comité d’organisaziun sch’igl è pussibel da manar tras las cursas. Era fin la mesemna pon ins s’annunziar per quests campiunadis grischuns ch’èn per tuts, d’uffants sut 12 onns fin creschidas e creschids.
- La sonda, ils 3 da favrer a las 10:00 è la partenza per la cursa singula en il stil liber.
- La dumengia, ils 4 da favrer a las 10:00 è la partenza per il sprint d'equipa en il stil classic.
