Siglir tar il cuntegn

Header

audio
Surselva Maraton 2022: Impressiuns e reacziuns da la cursa
Or da Sport ed actualitad dals 30.01.2022.
laschar ir. Durada: 4 minutas 8 Secundas.
cuntegn

Passlung Capelli e Boner gudognan il Surselva Maraton 2022

Marino Capelli e Seraina Boner, omadus oriund da Tavau, han gudagnà il Surselva Maraton, la cursa da passlung da 25 kilometers a Sedrun en la Val Tujetsch.

Marino Capelli, ch’ha triumfà per l’emprima giada al maraton da la Surselva, ha battì en il sprint final a Marius Danuser, oriund da Vättis. Quel era gia stà tar il davos maraton il 2020 sin il podest, numnadamain sco terz. Quest onn cumplettescha sco terz il podest, cun in retard da bunamain duas minutas, l’Engiadinais Curdin Räz.

Tar las dunnas ha Seraina Boner gudagnà gia per la quarta giada il Surselva Maraton. Uschia ha ella gudagnà uschè bleras giadas sco ses um, Toni Livers. Quel ha stuì desister d’ina partenza ord motivs da sanadad. Boner ha gudagnà a moda suverana cun in avantatg da passa duas minutas sin la Taliana Laura Colombo. Terza è vegnida Maria Christen da Hospental.

La cursa curta sur 12,5 kilometers, pia ina da duas rundas sin la loipa tujetschina, han gudagnà tar las dunnas Monika Bearth da Sedrun e tar ils umens Elia Sossai da Trun.

President dal maraton sa mussa cuntent

Tut en tut èn stads a la partenza bunamain 200 curridras e curriders – in zic pli pauc ch’ils onns avant. Pervia da la pandemia da corona era il maraton vegnì annullà l’onn passà. Il comité d’organisaziun cun lur president Guido Friberg è cuntent ch’igl ha puspè dà quest onn ina cursa, quai cun tegnair en diversas perscripziuns da corona.

audio
Surselva Maraton 2022: Bilantscha dal president Guido Friberg
ord Sport ed actualitad dals 30.01.2022.
laschar ir. Durada: 3 minutas 21 Secundas.

Ch’il dumber da participants sa sminueschia, haja era da far cun il fatg ch’adina pli paucs curriders indigens e populars desistan sin far cursas. Tuttina saja la finamira er da manar atras il Surselva Maraton il 2023, uschia Friberg.

RTR actualitad 17:00

Artitgels legids il pli savens

Scrollar a sanestra Scrollar a dretga