Siglir tar il cuntegn

Header

Legenda: Dario Cologna durant la cursa da la cuppa mundiala da chasa a Tavau. Keystone
cuntegn

Passlung Cologna: «Ina stagiun constanta e solida»

Als campiunadis svizzers da passlung a Sedrun ha Dario Cologna terminà sia stagiun 2020/21, e quai cun in ulteriur titel da campiun svizzer. Il Jauer ha triumfà a moda suverana en la cursa roiala sur 50 kilometers en il stil classic ed uschia gudagnà sia 18avla medaglia dad aur tar l’elita.

audio
Dario Cologna tira bilantscha da la stagiun 2020/2021
03:40 min, Sport ed actualitad dals 28.03.2021.
laschar ir. Durada: 03:40 minutas.

En la cuppa mundiala hai tanschì la stagiun passada ina suletta giada da far il pass sin il podest. En l’etappa dal Tour de Ski a Müstair sur 15 kilometers stil classic è Cologna vegnì segund. Prestaziuns fitg solidas ha il Jauer er mussà al punct culminant da la stagiun, ils campiunadis mundials ad Oberstdorf. Cologna ha cuntanschì là trais plazs sut ils top 10, dentant manchentà da gudagnar ina medaglia, memia ferma la concurrenza ord la Norvegia e la Russia.

Leader e numer 1 en Svizra

Il temp dad aur cun medaglias e plazs da podest en seria è passà. Tuttina ha Cologna mussà ch’el è anc adina il ferm passlunghist en Svizra. E grategi da mussar la cursa perfetga, lura èsi er pussibel da far il pass sin il podest. Er cun ses 35 onns ha la concurrenza grond respect dal leader svizzer.

Uss sa legra Dario Cologna sin in temp in zic pli ruassaivel, sche pussibel era cun passentar intginas vacanzas en il sid. E cuntinuescha sia carriera lura vegnia el a far tut il pussibel da pudair ir top fit a la partenza dals gieus olimpics il favrer 2022 a Peking, il proxim e probabel davos punct culminant da sia carriera.

RTR actualitad

Artitgels legids il pli savens

Scrollar a sanestra Scrollar a dretga