En vista a la stagiun 2019/2020 che cumenza la fin da november a Kuusamo en la Finlanda ha Dario Cologna midà intgins detagls. Tranter auter ha el trenà forza a Balzers sut la batgetta da Micha Eder, e quai ensemen cun atletas ed atlets ord auters sports, sco per exempel la skiunza Tina Weirather.
Cursas da chasa stattan en il center
Far ina buna figura vul Dario Cologna questa stagiun oravant tut en las cursas da chasa, mez december a Tavau Nordic e lura tranter Nadal e Bumaun al Tour de ski a Lai. Quellas cursas han prioritad en ina stagiun senza campiunadis mundials u gieus olimpics. E da Lai ha Cologna bunas regurdientschas. Al davos Tour de ski là avant dus onns aveva il passlunghist da la Val Müstair pudì gudagnar duas cursas.
Anc adina bler pussibel
A lunga vista ha Dario Cologna ils gieus olimpics a Peking en mira, quel èn l'onn 2022. Er sche quels sajan anc in toc davent, gugent fiss el era là a la partenza, pli probabel ses davos punct culminant da la carriera. Il mument saja la motivaziun gronda e sche tut constettia saja anc adina bler pussibel, uschia Dario Cologna, la locomotiva en il team svizzer.
RR sportissimo 17:00