Per atletas ed atlets da professiun èn cursas populars sco appunto il Planoiras a Lai, il Maraton da la Surselva u er il Passlung en Engiadina Bassa bunas pussaivladads per emplenir las fins d’emna senza cursas sin nivel professiunal, sco per exempel da la cuppa continentala u la cuppa mundiala. Uschia ha era la passlunghista d’elita Giuliana Werro nizzegià la fin d’emna per far part a la cursa Passlung. Sco gia tar la cursa Planoiras è Giuliana Werro era tar il Passlung stada la pli sperta.
Premiera tar il Passlung
Anc mai ha la passlunghista da Zernez fatg part a la cursa da Martina a Scuol. E gist tar sia emprima participaziun gudogna Giuliana Werro cleramain la cursa, era sche la concurrenza è stada ferma cun inquala concurrenta ch'ha era gia fatg part a cursas da la cuppa mundiala.
Giuliana Werro ha nizzegià la cursa per empruvar tschertas chaussas. Uschiglio fa ella durant l’enviern surtut part a las cursas da la cuppa continentala. Tranteren po ella dentant er ir a la partenza da cursas da la cuppa mundiala. Uschia è ella sa participada quest enviern per l’emprima giada a cursas dal Tour de ski.
Gugent far part al Maraton da skis engiadinais
La stagiun passada aveva Giuliana Werro gudagnà la cursa da renum internaziunal, il Maraton da skis engiadinais. Gugent empruvass ella da defender era quest onn puspè il titel. Anc n'è dentant betg cler sch’ella po esser a la partenza dal Maraton. Quai dependa dal chalender da trenamaint e tgenina cursa che fa dapli senn per la passlungista da 24 onns.