Siglir tar il cuntegn

Header

Anja Lozza, Giuliana Werro
Legenda: Per Anja Lozza (sanester) e Giuliana Werro va in siemi en vigur a las cursas da Tavau Nordic 2020. Andreas Wieland
cuntegn

Passlung Duas Engiadinaisas avant lur premiera

Giuliana Werro (21) da Zernez ed Anja Lozza (20) da Zuoz dattan questa fin d’emna lur debut en la cuppa mundiala da passlung. Las duas giuvnas passlungistas engiadinaisas dastgan ir a la partenza a la cursa da 10 kilometers en il stil liber a Tavau.

Tant per Giuliana Werro sco er per Anja Lozza è quai in mument tut aparti e franc in dals puncts culminants da la carriera. Per l’emprima giada dastgan ellas sa mesirar cun l’elita mundiala da passlung. L’emprima finamira è da rimnar bleras experientschas e da propi fufragnar ina giada en quest mund d’elita. Il resultat na gioga uschia betg la rolla centrala. E tuttina emprovan omaduas da nizzegiar quella schanza e da mussar la meglra cursa pussibla al pe dal Flüela, sin quella loipa nua ch’ils Svizzers treneschan la gronda part.

Fans ed amis ston persequitar la cursa a la televisiun

Displaschaivlamain croda il debut en la cuppa mundiala gist en la crisa da corona. Uschia na pon las duas Engiadinaisas betg parter quest mument spezial cun lur famiglia, fans ed amis. Las cursas da Tavau Nordic vegnan numnadamain manadas atras quest onn senza fans ed aspectaturs pervia da la critica situaziun da corona. Ord quest motiv n’han er tut ils passlunghists scandinavs betg fatg il viadi a Tavau. Il bun, la schanza d’uschia cuntanscher in bun resultat en l’emprima cursa da la cuppa mundiala è dada per Giuliana Werro ed Anja Lozza.

Cursas Tavau Nordic

La cursa da las dunnas sur 10 kilometers en il stil liber cumenza la dumengia (13-12) a las 10:45 uras. Il suentermezdi a las 13:30 uras partan ils umens sur 15 kilometers en il stil liber.

Actualitad 07:00

Artitgels legids il pli savens

Scrollar a sanestra Scrollar a dretga