Siglir tar il cuntegn

Header

audio
Discurs cun Toni Livers en vista a la stagiun 2019/2020
Or da Sportissimo dals 07.12.2019.
laschar ir. Durada: 6 minutas 38 Secundas.
cuntegn

Passlung Er cun 36 anc plain motivaziun

Toni Livers sa chatta en l’atun da sia carriera, ma il passlunghist oriund da Trun ha anc betg avunda dal sport da prestaziun, memia gronda la motivaziun ed il plaschair vid il passlung.

Avant exact 16 onns ha Toni Livers dà ses debut en la cuppa mundiala da passlung, quai a Tavau. Ed a Tavau ha il Sursilvan lura era gist gudagnà sia emprima e suletta cursa da la cuppa mundiala. Il favrer 2007 ha el triumfà avant ses fans da chasa en la cursa da 15 kilometers en il stil liber, sia tecnica preferida.

Toni Livers
Legenda: Toni Livers suenter avair gudagnà la cursa da 15 km da la cuppa mundiala il 2007 a Tavau. Keystone

Livers è dapi onns ed onns in dals megliers passlunghists svizzers ed ha oravant tut er festivà intgins gronds success cun la staffetta svizra. Tranter auter ha el gudagnà ensemen cun Dario Cologna, Curdin Perl e Remo Fischer la cursa da staffetta da la cuppa mundiala avant bun 9 onns a La Clusaz en Frantscha, in success istoric.

Preferenza per las distanzas lungas

Dapi intgins onns na parta Toni Livers betg pli a tuttas cursas da la cuppa mundiala, persuenter va el adina puspè a la partenza a cursas da distanza lunga, sco quellas da la seria Worldloppet. Tar quella seria tutgan tranter auter la Marcialonga en l’Italia, il Vasaloppet en Svezia u il Birkebeiner en la Norvegia. Ses puncts culminants e sias grondas finamiras en la cuppa mundiala durant questa stagiun 2019/2020 èn en spezial las cursas da Tavau Nordic mez december ed il Tour de Ski che cumenza ils 28 da december a Lai.

Avant paucs mais èn Toni Livers e sia dunna Seraina Boner, medemamain passlunghista, daventads per l’emprima giada geniturs, quai d’in buob.

RTR Sportissimo 17:00

Artitgels legids il pli savens