Siglir tar il cuntegn

Header

audio
Livio Bieler betg pli en in cader naziunal da Swiss Ski.
Or da Actualitad dals 27.05.2020.
laschar ir. Durada: 03:23 minutas.
cuntegn

Passlung Livio Bieler è sa decidì per la Norvegia

Il passlungist da Panaduz Livio Bieler ha dacurt stuì magunar ina pulita frida. El n’ha betg dumagnà ils criteris da selecziun da Swiss Ski ed è uschia vegnì bittà ord il cader naziunal en vista a la proxima stagiun 2020/2021. Ils davos onns ha Bieler fatg part al cader B da Swiss Ski.

Jau sun stà fitg trumpà e quella decisiun da Swiss Ski ha er fatg mal suenter esser stà bun 10 onns en il cader naziunal.
Autur: Livio Bielerpasslungist

Ina gronda surpraisa n’è quai dentant tuttina betg stà. Livio Bieler n’è numnadamain betg vegnì sin turas la stagiun passada. Plirs detagls n’han betg constà, quai gia durant la preparaziun la stad. E durant l’enviern n’èsi er betg ì sco giavischà, principalmain al Tour de Ski, ses punct culminant da la stagiun passada. La finamira era da terminar quest Tour sin l’Alpe Cermis. Ma Bieler ha stuì dar si gia avant las etappas finalas en la Val di Fiemme.

Plan B enstagl da terminar la carriera

Il davos temp durant il temp da Corona ha Livio Bieler ponderà da radent co vinavant. El haja era fatg patratgs da sa retrair e metter ils skis d’ina vart. La finala è il passlunghist da 27 onns dentant sa decidì per in’autra via, da cumbatter vinavant per in plaz enavos en il cader naziunal cun la finamira da puspè dastgar partir a cursas da la cuppa mundiala.

Per mai èsi cler, jau vi puspè turnar enavos en il cader svizzer ed en la cuppa mundiala da passlung e gudagnar là puncts. Quai sto er esser mia finamira.
Autur: Livio Bielerpasslungist

Perquai ha Livio Bieler fatg satg e pac ed è charrà mez matg direcziun Trondheim en la Norvegia. Là vul el restar e trenar enfin mez november, quai cun l’agid d’in bun ami da scola ch’abitescha e studegia a Trondheim e che sa gida en emprima lingia cun il support. Livio Bieler che vala oravant tut sco spezialist en il stil classic è uschia persvadì d’avair chattà ina buna schliaziun. El dovri uss buna glieud enturn el, in bun conturn, ina buna gruppa da trenar sco er bunas cundiziuns per realisar ses siemi da turnar enavos al success.

Ina gronda midada

Livio Bieler abitescha en in studio a Trondheim. Bler sto el sa chapescha er far sez – quai davent dal cuschinar fin l’organisar, unscher skis e per gronda part er trenar sulet. I saja franc ina gronda midada, di l’atlet ch’ha vivì ils davos onns a Tavau. El sa sentia dentant gia detg bain en ses nov dachasa en la Norvegia che vala sco il Mecca per il sport da passlung.

Actualitad 12:00

Artitgels legids il pli savens

Scrollar a sanestra Scrollar a dretga