Il giuven Tuatschin Cla-Ursin Nufer è ina da las grondas speranzas da passlung en Svizra. Dapi la stagiun passada tutga il giuven da 18 onns tar il cader C, sut 20 onns da Swiss Ski. Cun sia emprima stagiun sco atlet dal cader C saja el detg cuntent, raquinta el.
Punct culminant al campiunadi mundial da juniors
En buna memoria a Cla-Ursin Nufer resta spezialmain il campiunadi mundial da juniors ad Oberwiesenthal en Germania il cumenzament da mars. En la cursa sur 30 kilometers è el vegnì 16avel ed en la cursa da staffetta hai tanschì per plazza 4.
Questa cursa da staffetta è ina cursa ch'jau na vegn mai ad emblidar.
Il campiunadi mundial è stà ses punct culminant da l'enviern passà. Uschiglio haja la constanza mancà magari. El haja fatg memia paucas pausas e plinavant er anc lavurà (el fa in emprendissadi sco bostger). Uschia saja el magari stà stanchel.
Emprendì bler
Suenter ina stagiun è adina er avant ina stagiun. Ils ultims mais ha Cla-Ursin Nufer emprendì inqual chaussa sur da sasez. Oravant tut chaussas mentalas, menziuna il giuven da Rueras. En giuvens onns emprendian ins, per exempel, da restar focussà avant las cursas. Qua haja el segir fatg in pass enavant l'ultima stagiun.
Ils proxims mais vul el metter il focus da trenament sin la spertadad. Quai saja ses grond deficit. Fin uss è el stà in spezialist da distanzas lungas. En il futur veglia el dentant er far furora en cursas da sprint.