Sch’ins sa terminar la carriera activa sin las loipas da chasa, alura è quai segira in regal. In regal che Livio Matossi da San Murezzan ha fatg ad el savess. Las cursas dal campiunadi svizzer da passlung a Silvaplauna eran las ultimas sin quest livel da Livio Matossi. Il passlunghist da 25 onns da San Murezzan vul cumenzar cun il studi da fisioterapia e dar forsa pli tard enavos insatge a giuvnas e giuvens che stattan al cumenzament da lur carrieras.
Diesch onns passlung sin livel professiunal
Sco giuvenot da quindesch onns ha Livio Matossi cumenzà da far las emprimas cursas sin livel da juniors. En ses emprims onns ha il passlunghist engiadinais pudì festivar ils pli gronds success. El ha gudagnà cursas da sprint, dentant er cursas da distanza. Suenter ils emprims onns e suenter avair fatg part a cursas da juniors, ha el fatg il pass tar ils giuvens ed uschia ha el pudì participar a cursas da FIS, dentant er a cursas da la cuppa da las Alps. Matossi è avanzà en ils caders da Swiss Ski e sco atlet ha el perfin pudì prender part a cursas da la cuppa mundiala, las cursas da Tavau Nordic.
Jau n’ha badà che mes corp na fa betg pli cun uschia sco durant mes giuvens onns
Problems da sanadad, decisiun da chalar
La davosa stagiun ha Livio Matossi badà ch'i vegn adina pli difficil per ses corp da sa recrear dals strapatschs. Perquai ha el decidì da chalar cun sia carriera activa i da cumenzar in studi da fisioterapia. En futur vuless el dentant restar fidaivel a ses sport e dar vinavant sias experientschas a la proxima generaziun.