Pir en la 57avla minuta aveva Dübendorf anc pudì egualisar la partida al 4:4. Strusch 2 minutas en la prolungaziun ha l’equipa d’emprima liga lura sajettà il gol decisiv.
Gia l’onn passa era Tavau crudà ora en la Cuppa svizzer. Lura en la segunda runda cunter in’equipa da la liga naziunala B il HC Visp. Las ulteriuras equipas da la liga naziunala A han tuttas gudogna lur partidas.
Nagina schanza per il EHC Cuira
Ed era per la segunda equipa grischuna è la Cuppa svizra gia a fin. Il club da hockey da Cuira ha gì nagina schanza cunter il vice campiun svizzer. Ils ZSC Lions han declassà il EHC Cuira cun 9:2.
Trais gols en l’emprim e quatter gols en il segund terz, han rut il schlantsch da Cuira e decis il gieu a favur da Turitg.
Igl ha fatg plaschair
«L’emprim gol è vegnì in zichel memia bauld», manegia l’attatgader engiadinais dal club da hockey da Cuira, Livio Roner. Els hajan empruvà da giugar il pli simpel pussibel da davos enavant, dentant da giugar cunter ina da las meglras equipas da l’Europa saja grev. Malgrà la terrada haja quai fatg plaschair, concluda Livio Roner.
Plaschair han er gì ils passa 5000 aspectaturs ch’eran preschents en la halla da glatsch da Cuira. Malgrà la clera terrada han ils fans festivà l’equipa da Cuira sco victurs.
Ulteriurs gieus:
Lyss - Fribourg 1:3
Forward Morges - Losanna 1:6
Langenthal - Berna 2:3
Uni Neuchâtel - Genevra/Servette 2:10
Winterthur - Lugano 1:2