Siglir tar il cuntegn
Inhalt

Regiunal Per l’emprima giada in turnier da dunnas a l’Europeada

A la terza Europeada ch’è quest onn en il Tirol dal sid datti ina premiera. Las dunnas han lur agen turnier. Tranter las sis equipas è era in’equipa rumantscha, furmada en emprima lingia da giugadras da Schluein Glion e da Tusaun/Cazas.

Ina part da las giugadras rumantschas
Legenda: Ina part da las giugadras rumantschas mad

Rinforzadas vegnan las Rumantschas da Gianna Klucker ch’ha giugà la stagiun passada en cun in’equipa da College en ils Stadis Uni da l’America.

Ils giugaders rumantschs suenter in trenament
Legenda: Ils giugaders rumantschs suenter in trenament mad

Ils Rumantschs per la terza giada cun il medem trenader

Sco gia a las duas emprimas Europeadas en Surselva ed en la Lausitz en Germania è era questa giada Eros Bonolini il scheftrenader dals Rumantschs. Ina gronda part dals giugaders che Bonolini ha pudì recrutar dattan en la secunda liga cun Schluein Glion, in dat a Cuira, il rest tar divers clubs da la Surselva. Giugaders da l’Engiadina ni dal Surmeir haja el betg pudì motivar deplorescha Bonolini. Da la qualitad da ses giugaders è Bonolini dentant persvadì. Probabel saja quai la pli ferma equipa Rumantscha da tut il temps a l’Europeada.

Europeada en il territori tudestg e ladin dal Tirol dal sid

La terza Europeada vegn dada en 8 divers lieus dal Tirol dal sid. En la Val de Puster ed en la Val Badia. Las duas equipas Rumantschas prendan dimora a San Martin de Tor en la Val Badia, in lieu nua ch’ì vegn discurrì ladin da las Dolomitas.

30 equipas sa mesiran durant in’emna

24 equipas dad umens e 6 equipas da dunnas èn a l’Europeada, il turnier da ballape da las minoritads linguisticas da l’Europa. Ils emprims gieus da gruppa èn dumengia, ils 19 da zercladur. Gievgia cumenzan ils quartfinals. Ils finals èn lura sonda, ils 25 da zercladur.