Piranha Cuira: Cun schlantsch en la nova stagiun

Il club grischun vul puspè turnar enavos sin il tron dal unihoc. Suenter tschintg titels da campiun svizzer en seria, aveva l’equipa da las dunnas da Cuira stuì laschar dominar l’onn passà il grond rival, l’UHC Dietlikon.

Giugadras da unihoc Bild in Lightbox öffnen.

Legenda da maletgs: Il cader da Piranha Cuira da la stagiun 2017/2018. MAD

Piranha Cuira ha pers la stagiun passada tant il final da la cuppa svizra (0:5) sco er il superfinal dal campiunadi (2:7) encunter Dietlikon, ed uschia mintgamai stuì sa cuntentar cun il segund plaz. Questas terradas hajan dentant era procurà per in nov vent en l’equipa, manegia la capitania da Piranha Cuira Seraina Ulber.

Ch’il titel da campiun svizzer va er en questa stagiun sur Piranha e Dietlikon, da gliez n’ha nagin dubi. Ch’i na vegn dentant betg simpel per las Grischunas da turnar enavos sin il tron, da gliez è l’equipa conscienta. En l’equipa da Cuira hai numnadamain dà intginas grondas midadas. Per l’ina han cun Ladina Sgier, Manuela Dominioni, Sonja Putzi e Ramona Ludwig gist quatter giugadras naziunalas terminà lur carrieras. Cun quest quartet va a perder blera rutina e classa.

Corin Rüttimann enavos tar Piranha

Ina che duai serrar la largia en il cader da Piranha Cuira è Corin Rüttimann. L’indigena ha giugà ils davos quatter onns en Svezia, en la meglra liga dal mund, ed è ussa puspè turnada enavos tar ses club da chasa. A Piranha èsi uschia gartegià da far in top transfer. Corin Rüttimann tutga numnadamain tar ina da las meglras giugadras d’unihoc dal mund. La davosa stagiun ha ella gudagnà cun IKSU Innebandy il titel da campiun en Svezia.

Plinavant han er trais junioras or dal club sez pudì far il pass en il cader naziunal. Sper Chiara e Luana Rensch er Nicole Capatt. Tuttas trais valan sco gronds talents e duain procurar che Piranha Cuira resti a la testa dal sport d’unihoc en Svizra er en l’avegnir.

RR Sportissimo 17:00