La carriera da skis da Selina Egloff da Scuol è ida fin da qua adina amunt. Dal cader regiunal ha il talent da skis fatg gia cun 17 onns il pass en il cader B da la federaziun Svizra da skis, Swiss Ski. La stagiun passada era Selina Egloff la pli giuvna atleta en in cader da Swiss Ski. Era durant questa stagiun en il cader B cun collegas d’equipa sco per exempel Charlotte Chable e Camille Rast è Selina Egloff anc adina la pli giuvna. Sco Chable e Rast vul era Selina Egloff partir insacura en la cuppa mundiala da skis. Il pli gugent gia durant la nova stagiun.
Campiunessa svizra da junioras
La davosa stagiun era fin uss la meglra da Selina Egloff. Suenter ch’ella ha pudì ir a la partenza da cursas da FIS al principi da sia carriera giuvna, ha ella fatg la stagiun passada quasi tut las cursas da la cuppa d’Europa. La seria da cursas gist suenter la cuppa mundiala da skis. Duas giadas è ella sa rangada la stagiun passada tranter las meglras diesch. Ils megliers resultats èn dentant reussì a la giuvna skiunza da Scuol la fin da l’enviern. Selina Egloff è vegnida campiunessa svizra da junioras en il slalom, e tar l’elita è ella vegnida terza en la disciplina dal slalom gigant. Mo Camille Rest e la campiunessa mundiala da la cumbinaziun alpina Wendy Holdener eran anc pli spertas che la skiunza da Scuol.
RR actualitad 07:00