Far viadi cun il velo sco l’aua da l’En cula giu da la val. Quai è l’idea dal project «Move Inn» da la Convenziun da las Alps, la cunvegna tranter ils otg pajais da las Alps per la protecziun ed il svilup persistent da las Alps. Questa stad datti l’emprim project ch’è vegnì sviluppà dals trais pajais Svizra, Austria e Germania.
Il project maina giuvnas e giuvens da Bever fin a Passau, nua che l’En sbucca en il Danubi. Ils uffants grischuns fan l’etappa fin a Strada. Sin lur viadi campeschan ils uffants duas giadas, avant ch’els surdattan la batgetta simbolica a lur cumpogns dal Tirol dal Nord. Quels surpiglian la batgetta dal viadi fin tar il cunfin cun la Germania/Baviera. Da là cuntinuescha il viadi simbolic fin a Passau.
Bler da vesair ed emprender
Betg mo l'ir cun velo stat en il focus, dentant er la natira. L’emprima saira per exempel han ils uffants udì il castur ch’è puspè da chasa en l’Engiadin’Ota. Il guardiaselvaschina Thomas Wehrli aveva raquintà da sias experientschas. La segunda giada han ils uffants campà a Lavin. Da là or èn els partids en la terz’etappa vers Strada – cun in curt stop a Ftan. Là han els visità il mulin.
A Strada, a la fin da la davosa etappa, hai anc dà in’invista en la renaturalisaziun da l’En, quai en il conturn da las ognas da San Niclà. Sco davos punct surdattan ils uffants la batgetta simbolica ad uffants dal Tirol.