Cun auto e moto da maximalmain 50 PS atras la Sahara. Quai è l’aventura ch'in quartet da Scuol fa questa primavaira. L’idea da far part a la rallye Europa Africa Rodeo è naschida en sortida. In dals quatter amis da Scuol ha fatg la proposta da participar ina giada ad ina rallye. L’emprim era quai be in'idea. Pli ditg che la saira è però ida e pli concreta che l’idea è vegnida. La damaun baud era cler ch'il quartet participescha sco equipa «Engadin mountain snails» a la rallye.
Mintga dus u trais dis han ins da passar in «checkpoint». Co ins arriva là, è surlaschà a mintgin.
Autos e motos cun maximalmain 50 PS
Las cundiziuns per prender part a la rallye Europa Africa Rodeo èn simplas. Ils autos cun ils quals ils participants fan la rallye, na dastgan betg avair dapli che 50 PS, cun excepziun sche l’auto è pli vegl che 20 onns. Alura po el avair 60 PS. Speras na datti naginas ulteriuras pretaisas. Durant la rallye che maina da Genua cun la bartga a Tanger en il Maroc e da là fin a Marrakesch sur la chadaina da muntognas dal Atlas e la Sahara enavos a Tanger fan ils participants 5'000 kilometers. La finamira da la rallye è dad arrivar enavos a Tanger. Las radund 80 equipas han 18 dis peda per quest viadi.
Aventura cun aspect caritativ
Durant lur viadi en il Maroc cun autos e motos plitost vegls vegnan ils giuvenots da Scuol segira a far fitg bleras experientschas. Il viadi n'è dentant betg be in'aventura, dentant ha la rallye era in aspect social. Cun lur participaziun sustegna mintga singula equipa era projects caritativs, sco per exempel la construcziun da scolinas en il Maroc.
