Ils organisaturs dal maraton da velo engiadinais avessan gì quest onn motiv da far festa. Il maraton da velo enturn Zernez avess pudì festivar il giubileum da quindesch onns. La cursa è avanzada durant quest temp ad in element impurtant en il chalender d’occurrenzas da la stad en Engiadina. Mintga onn participeschan radund 1’500 ciclistas e ciclists a la cursa.
Betg pussibel da tegnair distanza
Sport da velo è magari era sport da contact. Las ciclistas ed ils ciclists èn durant la cursa strusch in sper l’auter. Uschia èsi spert cler ch'i na va betg d'organisar il maraton da velo engiadinais quest onn. Bain han ins discurrì davart la varianta da far la cursa en gruppas pli pitschnas u alura da spustar la cursa sin l’atun. Quella discussiun è dentant stada a fin fitg spert. Pervia da la situaziun actuala na sa ins betg cun garanzia sche la cursa avess pudì avair lieu l'atun. Uschia che l’annullaziun da la cursa da quest onn era la logica consequenza.