Cuira 97 terminescha runda d’atun cun ina victoria
Dus onns èsi ì mo engiu cun il club da ballape da Cuira 97. Duas relegaziuns en seria. Da l’emprima liga en la segunda liga interregiunala e davent da là direct en la segunda liga regiunala. Quella vulan ils da Cuira bandunar tant pli spert. La missiun ha num promoziun. Suenter ina seria pli flaivla cun mo dus puncts da 3 gieus, ha Cuira terminà la runda d'atun cun ina victoria da 2:0 encunter Rebstein. Ina fin concilianta per l'equipa da Thomas Waser.
Cun bun sentiment en pausa d’enviern
Cuira 97 va sco cler emprim da la tabella en quella pausa d’enviern. Oravant tut a l'entschatta dal campiunadi ha Cuira persvas cun 7 victorias en seria. Lura ha la concentraziun dentant laschà suenter. L'equipa da Thomas Waser ha u gì il nas memia ad aut u è stada memia segira da sa sezza. Mo en il davos gieu da la runda d'atun ha Cuira puspè chattà la via al success. L'equipa da Thomas Waser po pia ir cun in bun sentiment en la pausa d'enviern.
La proxima fin d'emna dat Cuira anc en la cuppa grischuna ordaifer encunter ils Lusitanos de Samedan. Lura cumenza la pausa d’enviern, respectiv la preparaziun sin la runda da primavaira cun la finamira promoziun.
Schluein cumbatta cunter relegaziun
Entant che Cuira 97 cumbatta en la segunda liga regiunala per la promoziun, cumbatta Schluein Glion encunter la relegaziun. Schluein Glion ha pers a Buchs cun 0:2 ed è cun mo 8 puncts sin il terz davos plaz. Mo Rapperswil-Jona e Triesen èn cun 8 respectiv 6 puncts rangads mender.
Atun turbulent cun 3 differents trenaders
Schluein Glion ha gì in atun turbulent cun 3 differents trenaders. Gia suenter 5 rundas ha il trenader Urs Casutt fiers la fautsch en il chanvà ed ha demissiunà. Il trenader ch'ha manà Schluein Glion en la segunda liga ha timunà l'equipa per bunamain 6 onns. Lura è Eros Bonolini stà per in gieu interimistic sper la lingia ed ils davos 5 gieus ha Corsin Cavegn empruvà da trair il carr or da la merda. 3 terradas e dus paris è la bilantscha da l’anteriur trenader da Lumnezia e da Trun/Rabius.