La nauscha novitad è vegnida gia avant che la nova stagiun da skis ha cumenzà: Carlo Janka è sa ferì durant il trenament sin la Diavolezza. Era per ses collega d’equipa Gino Caviezel è quai stà ina greva frida. Caviezel ha trenà durant l’entira stad ensemen cun Janka. El ha vis quant bain ch'il skiunz da Sursaissa era en furma:
Probabel n'ha Carlo Janka anc mai gì ina stad uschia buna. El era propi fitg bain en furma.
Per Janka vegn la stagiun ad esser a fin avant sco quai ch'ella ha cumenzà. Per Gino Caviezel percunter cumenza ella questa fin d’emna.
Uss vali da focussar sin sasez
Caviezel ha da pruvar da metter davart l'accident da ses ami Janka e da sa focussar sin sasez. Quai ha el er fatg durant il trenament da stad. Il skiunz grischun ha pruvà da lavurar vi da ses sbagls, el ha pruvà da minimar quels:
Or dals sbagls emprend ins. Jau crai d'avair fatg in pass enavant.
Cun l’emprima cursa da questa fin d’emna cumenza bain spert era la qualificaziun per il proxim eveniment grond, ils gieus olimpics il favrer dal 2018 en Corea dal Sid. Ils skiunzs n'han perquai betg ditg peda per mussar bunas prestaziuns. Pli baud, tant meglier.
RR actualitad 08:00