Sch'ina equipa tudestga da renum sco il Hamburger SV trenescha a Schluein amez la regiun turistica da Flem, Laax, Falera, lura vegn ella accumpagnada da schurnalists, fotografs e d'equipas da televisiun. Quai è buna reclama. Tuttina ha Grischun vacanzas decidì suenter duas stads da na betg prolungar il contract da collavuraziun cul Hamburger Sportverein.
Duas raschuns principalas
Tenor il directur da Grischun vacanzas Martin Vincenz haja quai duas raschuns principalas. Ina saja ch’ins veglia sa concentrar en l’avegnir en la vendita e perquai desister da charas campagnas dad image. L’autra raschun sajan ils custs. In’equipa sco il HSV na vegni betg gratuitamain en il Grischun. E sch’ils custs sajan auts, lura stuess quai dar ina cuntravalur, vul dir in augment marcant da las pernottaziuns. Quai n'è evidentamain betg stà il cas.
RR actualitad 17:00