Regiunal - In di perfetg a la Trofea Péz Ault

Sper las cursas da la cuppa mundiala ch’han carmalà a Mustér la crème de la crème da quai sport, oravant tut blers atlets ord las Alps, pia atletas ed atlets svizzers, franzos e talians èn er sa participads bunamain 70 curridras e curriders populars. Sco ils onns passads han curridras e curriders pudì eleger tranter la ruta lunga «Verclisa» sur 14,3 kilometers cun 1’640 meters differenza d’autezza ni la ruta curta «Gendusas» sur 10,87 kilometers cun 952 meters differenza d’autezza.

Dira cursa, ma bellezza

In giubileum ha er Felicia Deflorin pudì festivar. Ella è adina stada a la partenza a la Trofea Péz Ault, er quest onn ensemen cun sia sora giuvna Justina Deflorin. Las duas soras da Mustér han duvrà per la ruta Gendusas 2:36 uras. I saja stà dir e chaud, dentant bellezza, uschia Felicia Deflorin.

Senza ils voluntaris na va nagut

Ils protagonists da la Trofea Péz Ault èn sa chapescha las atletas ed ils atlets. Els han giu quest onn cundiziuns perfetgas, malgrà che bain inqual ha patì da la chalira. Impurtant è uschia er stà da baiver bler durant la cursa. Perquai hai dà numerus posts cun diversas bavrondas, bananas, riegels ed anc auter.

I ha er dà blers posts da controlla sco quel giudim il Couloir da la Trofea, in dals puncts culminants e pli pretensius da questa cursa. Senza ils numerus voluntaris na fissi betg pussibel d’organisar ina tala cursa di Giochen Bearth, il schef da la ruta e dals voluntaris che tira in facit fitg positiv. Davart da l’organisaziun na saja da midar nagut pli, i funcziuneschi uschia tut sco giavischà e las rutas en il territori da Mustér sajan propi spectacularas.

RR sportissimo 17:00