Regiunal - Team RTR al gigatlon 2015

Tranter ils bun 5’000 gigatlets è er in team da Radiotelevisiun Svizra Rumantscha stà a la partenza, quai en in team da dus. Da la partida eran Andreas Wieland da la redacziun da sport e Marina Morgenthaler da la partiziun communicaziun e marketing. Il tun da partenza per il gigatlon 2015 è stà la sonda, ils 11 da fanadur, a las 6:00 uras. Enfin dumengia saira, ils 12 da fanadur, èn gigatletas e gigatlets stads sin viadi tras l’Argovia, saja quai en teams da tschintg, da dus u sco atlet singul.

Tge è gigatlon

L’istorgia dal gigatlon ha cumenzà il 1998. L’emprim grond success da quest’aventura ultrasportiva è stà durant l’exposiziun da la Svizra Expo.02. Lura era vegnì organisà l’emprim gigatlon durant in’emna, quai sur bunamain 1’500 kilometers enturn la Svizra. Dapi lura è il gigatlon onn per onn in dals gronds eveniments da sport en la Svizra ed ha er gia visità intginas giadas il Grischun.

5 disciplinas

Il gigatlon è ina maschaida tranter in’occurrenza da sport, in viadi d’aventura, in eveniment da team sco er ina sfida persunala. Persuls, en in team da dus u da tschintg absolvan ils gigatlets las tschintg disciplinas nudar, currer, inline, velo da cursa e mountainbike. Onn per onn han gigatletas e gigatlets da surmuntar culms e vals, lais e planiras, quai da sulegl e da plievgia. Per la gronda massa na stattan betg ils temps ed ils rangs en il center, mabain l’aventura communabla e las istorgias spectacularas.

«Discover History»

Quest onn è il gigatlon stà sut il motto «Discover History». Igl era in viadi istoric tras il chantun Argovia. Ils organisaturs han elegì questa regiun pervi d’in giubileum. L’Argovia è numnadamain vegnida deliberada dals Habsburgais avant exact 600 onns. Il camp da basa sa chattava a l’ur da la citad principala Aarau. Ulteriurs puncts centrals da quest onn eran Windisch, Wildegg, Hallwil e Lenzburg.

Avant il Gigatlon

Gigatlon sonda

Gigatlon dumengia e glindesdi