Remo Fischer ha triumfà quest onn en in temp da 51.11 minutas avant il Grischun Valerio Leccardi ed il Talian Morris Galli ch’ha pers omadus bun ina minuta sin Fischer. Ina buna prestaziun ha il mountainbiker Nino Schurter mussà. El è vegnì 17avel. Schurter ha pers en la cursa sur 19 kilometers 5.41 minuta sin Remo Fischer.
Seraina Boner ina classa per sasezza
Tar las dunnas ha la gronda favurita Seraina Boner da Tavau gudagnà avant Bettina Gruber che veva triumfà avant in onn a Lai. Boner è stada passa 5 minutas pli sperta che Gruber. Terza è vegnida Claudia Schmid.
La cursa pitschna, il Planoirino sur la distanza da 10 kilometers, ha gudagnà Andrin Kappenberger da Pfäffikon avant il bab dal Planoiras e president dal comité d’organisaziun, Urs Baselgia da Lantsch. Tar las dunnas ha Carmen Strub da Pfäffikon gudagnà il Planoirino.
4 rundas sin la loipa dal Tour de Ski
Il Planoiras 2016 n’è betg vegnì manà atras sco usità sin la loipa tranter Lantsch e Parpan, mabain sulet sin la loipa da Lantsch. Ils curriders han stuì surmuntar quatter rundas a bun 3,8 kilometers, per gronda part sin la loipa dal Tour de Ski. La partenza e l’arrivada per ils bun 400 curridras e curriders è mintgamai stà en l’arena da biatlon a Lantsch.