Cun in grond exchavatur ha il mastral da Tavau Tarcisi Caviezel dà l’emprima badigliada per la sanaziun dal stadion da hockey ch'è en possess da la vischnanca. La sanaziun custa 25,55 milliuns francs, 5 milliuns paja il chantun. In'uschè gronda summa n'haja il chantun anc mai pajà per in project d’infrastructura da sport, ha il president da la regenza Mario Cavigelli ditg a l’act festiv. In pau pli modest è e il segund project ch'è vegnì lantschà il medem mument. Il president dal Club da hockey da Tavau Gaudenz Domenig ha dà l’emprima badigliada per la construcziun d’ina halla da trenament che custa 8 milliuns francs. 7 milliuns paja il HCD, in milliun duai vegnir da la Confederaziun.
La «catedrala dal hockey» duai salvar ses scharm
Sviluppar in project per la sanaziun dal stadion da hockey da Tavau saja stà ina sfida, ha l’architect Daniele Marques ditg. Dad ina vart stoppia e veglia ins salvar la bellezza construcziun da lain dal stadion ch’ha dà a quel il surnum «catedrala dal hockey», da l’autra vart saja da transfurmar il stadion vegl en in stadion modern e funcziunal.
Construcziun en trais etappas
L’entir project da sanaziun vegn realisà durant trais onns en trais etappas, mintgamai da la primavaira fin tard l’atun. Il project cumpiglia la construcziun d’ina nova tribuna en il sid dal stadion, novas gardarobas e duschas e la sanaziun da las tribunas en il vest ed en l’ost cun in augment da las plazzas da seser sin donn e cust da las plazzas da star en pe. Plinavant vegn fabritgà in tschertgel enturn il stadion cun in ulteriur restaurant, stans da mangiativas e bavrondas, in museum dal club ed ina butia cun artitgels da fans.
Il manaschi dal HCD sto era funcziunar durant la sanaziun
La sanaziun dal stadion ha sa chapescha influenza sin il manaschi da gieu e da trenament dal Club da hockey da Tavau. Durant duas stads na pon ils giugaders da l’emprima equipa, ma era las diversas equipas da juniors, betg trenar en il stadion. Per tuttina pudair trenar dovria la halla da trenament che vegn construida da nov. Quella haja perquai prioritad ha il CEO dal HCD e president da la Cuppa Spengler Marc Gianola ditg. La halla projectada dal biro d’architectura Fanzun a Cuira vegn construida en in temp da record e duai gia esser pronta la fin da settember da quest onn.
Regal da giubileum per il campiun da record
Las lavurs da sanaziun dal stadion a Tavau duain esser terminadas l’atun 2020. Il stadion è uschia pronts per l’onn da giubileum dal HCD. Il campiun svizzer da record festivescha l’onn 2021 ses tschientavel anniversari. Fin l’ura ha il Club da hockey da Tavau in stadion modern che duai dentant – tenor Gaudenz Domenig – restar quai ch’el saja gia uss: «il pli bel stadion da hockey dal mund».
RR actualitad 07:00