Siglir tar il cuntegn

Header

Livio Simonet
Legenda: Livio Simonet è sin buna via da fitgar pe en la cuppa mundiala. Keystone
cuntegn

Sandro e Livio Simonet «Tar nus na datti nagina ierarchia»

Per l’emprima giada fa Livio Simonet (23) part ad in cader pli aut da Swiss Ski che ses frar grond Sandro Simonet (26). Tar las selecziuns da cader per la stagiun 2022/23 è Sandro Simonet vegnì tramess dal cader naziunal en il cader C. Ses frar giuven Livio Simonet fa vinavant part dal cader B.

Che Sandro Simonet è vegnì bittà ord il cader naziunal, quai suenter be ina stagiun, n’è nagina surpraisa. Il Surmiran da 26 onns ha gì ina stagiun d’emblidar. En 9 slaloms da la cuppa mundiala ha el gudagnà be ina suletta giada puncts, quai sco 21avel al slalom da notg a Schladming la fin schaner. En 6 slaloms ès el crudà ora e duas giadas n’hai betg tanschì da sa qualifitgar per il segund percurs.

Per mai mida pauc. L’impurtant è ch’jau poss trenar vinavant cun la gruppa da la cuppa mundiala da slalom enturn in Daniel Yule, in Ramon Zenhäusern u in Loïc Meillard, quai sut la batgetta da Matteo Joris.
Autur: Sandro Simonet skiunz da la cuppa mundiala

Sportiv mida pauc tar Sandro Simonet. Sco commember dal cader C na survegn el però betg pli tanta vestgadira pajada da Swiss Ski ed er ses auto sto el uss pajar e finanziar sez. Sco commember dal cader naziunal surpiglia Swiss Ski quests custs.

Reabilitaziun e fisioterapia enstagl trenament

En ses davos slalom da la stagiun l’entschatta mars a Flachau è Sandro Simonet cupitgà e ed ha rut il liom cruschà. Avant sis emnas è el vegnì operà. Il mument impunda il skiunz rumantsch bler temp per la reabilitaziun e per fisioterapia. Er ses plan da trenament en vista a la nova stagiun ha el stuì metter sin il chau. Pervia da quest accident na po el betg cumenzar cun il trenament sin la naiv avant l’october. La gronda finamira per la proxima stagiun è da cuntanscher pli savens l’arrivada e procurar per bain inqual top resultat. Il talent e la classa ha el gia mussà bain savens, quai dentant per gronda part be en in da dus percurs.

Sandro è spezialist da slalom ed jau da slalom gigant, uschia avain nus dus total differents plans da trenament e nus trenain era quasi mai ensemen.
Autur: Livio Simonet skiunz da la cuppa mundiala

Per Livio Simonet ch’è trais onns pli giuven che Sandro Simonet na datti nagina midada. Il skiunz da 23 onns resta sco fin ussa en il cader B da Swiss Ski. El po guardar enavos sin ina stupenta stagiun. Per la proxima stagiun ha Livio Simonet dentant la finamira da pudair ir pli regular a la partenza da la cuppa mundiala, quai en sia disciplina da parada il slalom gigant. Il mument frequenta Livio Simonet la scola da recrut. Gia il fanadur spetgan lura dentant gia ils emprims trenaments sin la naiv, quai a Zermatt.

RTR actualitad 17:00

Artitgels legids il pli savens

Scrollar a sanestra Scrollar a dretga