Siglir tar il cuntegn
cuntegn

Regiunal Sandro Simonet – enavos al lieu da la premiera

Avant dus onns ha il giuven skiunz Sandro Simonet festivà a Levi sia premiera en la cuppa mundiala. Uss è Simonet enavos en Finlanda.

El va culs skis da slalom.
Legenda: Sandro Simonet tar sia premiera gartegiada a Levi en Finlanda. Keystone

Il november dal 2016 ha il giuven skiunz Sandro Simonet da Casti participà per l’emprima giada ad ina cursa da la cuppa mundiala da skis. E gia tar l’emprima cursa a Levi en Finlanda ha Simonet fatg il sigl en ils puncts. El ha terminà la cursa sin plazza 27.

Malgrà la premiera gartegiada n'èsi betg pli reussì a Simonet durant sia emprima stagiun en la cuppa mundiala da terminar anc ina segunda cursa en ils puncts. Quai è pir gartegià la stagiun passada.

Meglier resultat a la fin da la stagiun

A Kranjska Gora en Slovenia ha Sandro Simonet realisà ses meglier resultat – enfin uss. Il campiun olimpic da juniors ha terminà il slalom sin plazza otg. Il pli gugent vess il skiunz grischun gist cuntinuà cun la proxima stagiun.

La stad è dentant vegnida tranteren. Uss, suenter intgins mais senza concurrenzas sin pista, spetga Sandro Simonet vess sin il cumenzament da la nova stagiun. A Levi, al lieu da sia premiera en la cuppa mundiala, turna el segir cun buns sentiments.

RR actualitad 08:10