Ch’ils Sursilvans èn en questa situaziun na fa betg surstar. Schluein Glion dat pir la segunda stagiun en la 2. liga ed ha l’onn passà stuì cumbatter enfin il davos gieu cunter la relegaziun.Che la squadra da Domat è sut il stritg suenter la mesadad dals gieus, quai fa surstar. La stagiun passada ha Domat anc cuntanschì il segund rang, uss è l’equipa da Walter Frizzoni sut il stritg.
Situaziun da partenza da Schluein Glion meglra che l’onn passà
Urs Casutt: «Nus lavurain cun in fitg bun cader e vulain restar en segunda liga.»
L’equipa da Schluein Glion po ir cun in meglier sentiment ch’avant 1 onn en la runda da primavaira. Ils Sursilvans èn cun 12 puncts sin plaz 9 ed han 3 puncts avantatg sin in rang da relegaziun. Era cun la preparaziun è il trenader Urs Casutt cuntent. Ins haja sco usità trenà fisicamain. Mo els hajan era nizzegià il temp per integrar ils giugaders ch’eran vegnids vitiers da nov la stad.
Grondas midadas en il cader da Domat
Walter Frizzoni: «Jau sai or d’experientscha che quai vegn ad esser fin la fin ina dira chaussa.»
Suenter las mediocras prestaziuns da l’atun han ins reagì a Domat, il cader è sa midà bravamain. 10 giugaders han bandunà l’equipa, 8 novs èn vegnids vitiers. Tenor il trenader Walter Frizzoni sentian ins gia in effect en l’equipa. Ils giugaders sajan puspè pli ambizius.
Omaduas equipas cumenzan la runda da primavaira la sonda da Pasca. Schluein Glion dat a chasa cunter St. Margrethen e Domat dat ordaifer cunter Diepoldsau-Schmitter.
