Siglir tar il cuntegn

Regiunal Schluein/Glion resta en 2. - Domat sto ir en 3. liga

Ils resultats da la penultima runda en la 2. liga han decidì. Schluein/Glion ha gudagnà il cumbat per restar en 2. liga - Domat l'ha pers.

giugadurs da domat e schluein/glion tar in gieu il 2014
Legenda: Il cumbat per restar en segunda liga ha differentas fins: Domat va en terza - Schluein / Glion resta en segunda liga. RTR, archiv 2014

Schluein/Glion resta

Schluein/Glion ha fatg in pari encunter Weesen e na po uschia betg pli crudar en la 3. liga. Il 2013 aveva Schluein/Glion dumagnà il pass davent da la 3. liga en la segunda. Igl è uschia la segunda stagiun che l’equipa sursilvana sa defenda en 2. liga.

L'ultim gieu che Schluein/Glion dat cunter Rapperswil, po l’equipa dar senza squitsch. Quai gieu è sonda proxima a las 17:00. Perquai ch’il plaz a Schluein vegn actualmain sanà, vegn quai gieu giugà a Trun.

Domat croda

Fertant che Schluein/Glion po festivar in success, è la situaziun tut autra per Domat che sto giugar la proxima stagiun en la 3. liga. Quai è gia cler avant l'ultim gieu. La stagiun passada era l’equipa da Domat anc stada rangada sin plaz 2 en la segunda liga. Suenter 6 onns en segunda liga sto Domat ussa puspè far il pass enavos en la 3. liga.

RR sportissimo 12:00